Эмануэль Макрон заклікаў Еўропу да барацьбы з «праказай» папулізму

Прэзідэнт Францыі заклікаў падтрымаць праеўрапейскія ўрады.

Прэзідэнт Францыі Эмануэль Макрон заявіў аб сур'ёзнай пагрозе далейшага распаўсюду папулізму ў Еўропе і заклікаў падтрымліваць, а не крытыкаваць праеўрапейскія ўрады, паведамляе «Новое время» са спасылкай на Reuters.

Падчас свайго візіту ў французскую правінцыю Брэтань - адзін з найбольш праеўрапейскі настроеных рэгіёнаў краіны - Макрон заклікаў змагацца з тымі, хто «ненавідзіць Еўропу».

«Вы можаце бачыць, як яны [папулісты і еўраскептыкі] падымаюцца ва ўсёй Еўропе, падобна праказе, у тых краінах, дзе, як нам здавалася, ужо не ўбачым іх зноў, у суседніх краінах», - адзначыў французскі прэзідэнт.

«Яны робяць найгоршыя прамовы, і мы прывыкаем да гэтага. Яны правакуюць, але ніхто не прыходзіць ад гэтага ў жах», - падкрэсліў ён.

Як адзначае Reuters, заява Макрона прагучала на фоне ягонага нядаўняга супрацьстаяння з Італіяй, дзе нядаўна прыйшоў да ўлады новы ўрад, сфармаваны кааліцыяй правых антыеўрапейскіх папулісцкіх партый. Спрэчка паміж Рымам і Парыжам паўстаў праз судна Aquarius з 600 уцекачамі на борце, якое Італія адмовілася прымаць у свае парты. Макрон абвінаваціў італійскія ўлады ў «цынізме і безадказнасці», хоць адначасова стаў аб'ектам крытыкі і на радзіме, бо Францыя не прапанавала прыняць судна - у выніку яно адправілася ў Гішпанію.

«Мы вінавацім еўрапейцаў у тым, што яны не зусім такія, якімі мы хочам іх бачыць, але забываем асуджаць тых, хто больш не падобны на нас, тых, хто ненавідзіць [Еўропу], - сказаў Макрон.

«Мы звыкаемся з крайнасцямі ў гэтых краінах, якія гадамі былі праеўрапейскімі, як і мы, і ў гэтым пытанні наша дзелавая, журналісцкая і палітычная эліта нясе велізарную адказнасць», - падкрэсліў французскі прэзідэнт.