Дзесяць перашкод, якія замінаюць інавацыям у Беларусі
6- 15.06.2018, 14:10
- 8,757
Галоўны фактар - недахоп уласных грашовых сродкаў.
Белстат папрасіў арганізацыі, асноўным тыпам дзейнасці якіх з'яўляецца вытворчасць прамысловай прадукцыі, ацаніць фактары, якія перашкаджаюць інавацыям у Беларусі цягам апошніх трох гадоў.
На аснове гэтых звестак Thinktanks.by склаў Топ-10 бар'ераў, якія замінаюць інавацыям у Беларусі.
Галоўным фактарам, якія з'яўляюцца перашкодай для інавацый, прадстаўнікі беларускіх прадпрыемстваў назвалі недахоп уласных грашовых сродкаў. Яго назвалі на 687 прадпрыемствах.
На другім месцы ў ацэнках прадстаўнікоў беларускай прамысловасці выявіўся высокі кошт новаўвядзенняў. Пра гэта паведамілі на 506 прадпрыемствах.
Трэці ў папулярнасці адказ - «высокая эканамічная рызыка». Яе ў якасці бар'ера інавацыях назвалі ў 369 арганізацыях.
Працяглыя тэрміны акупнасці новаўвядзенняў у якасці перашкоды палічылі ў 333 прадпрыемствах.
На пятым месцы не эканамічная, а вытворчая прычына. 258 апытаных назвалі асноўным фактарам, які перашкаджае інавацыям цягам апошніх трох гадоў нізкі інавацыйны патэнцыял арганізацыі.
Аднак шостае і сёмае месца ў рэйтынгу ізноў занялі эканамічныя перашкоды - нізкі платаздольны попыт на новыя прадукты (247) і недахоп фінансавай падтрымкі з боку дзяржавы (244).
Восьмы радок у папулярнасці заняў адказ «недахоп кваліфікаванага персаналу». Гэты недахоп назвалі бар'ерам 160 прадстаўнікі прадпрыемстваў.
Яшчэ 143 чалавекі, якія давалі ацэнкі, не сталі шукаць унутраныя прычыны, а назвалі вонкавую праблему - неразвітасць рынку тэхналогій. Яна выявілася на дзявятай пазіцыі.
Замкнула Топ-10 бар'ераў для інавацый у прамысловасці «няпэўнасць тэрмінаў інавацыйнага працэсу». Аб гэтай перашкодзе заявілі на 132 беларускіх прадпрыемствах.