Нарвежскія парламентарыі вылучылі Трампа на Нобелеўскую прэмію міру

Раней кандыдатуру прэзідэнта ЗША вылучыла група амерыканскіх заканадаўцаў.

Два нарвежскія парламентарыі вылучылі прэзідэнта ЗША Дональда Трампа на Нобелеўскую прэмію міру пасля сустрэчы Трампа з паўночнакарэйскім дыктатарам Кім Чэн Ынам, якая адбылася ў Сінгапуры, паведамляе «Голос Америки».

Хрысціян Тыбрынг-Гьеддэ і Пер-Вілі Амундсен, якія належаць да Партыі прагрэсу, у сераду заявілі нарвежскаму інфармагенцтву NTB, што прэзідэнт Трамп «зрабіў велізарны і важны крок у бок раззбраення, міру і прымірэння паміж Паўночнай і Паўднёвай Карэяй».

Група амерыканскіх заканадаўцаў таксама падтрымлівае намінацыю Трампа на Нобелеўскую прэмію міру за 2019 год.

Разгляд і прысуджэнне ўзнагароды адбываецца ў Нарвегіі.

Кандыдатуры павінны быць паведамленыя Нобелеўскаму камітэту да першага лютага.