28 сакавiка 2024, Чацвер, 22:43
Падтрымайце
сайт
Сім сім,
Хартыя 97!
Рубрыкі

Невядомыя павалілі крыжы каля рэстарацыі «Поедем поедим»

11
Невядомыя павалілі крыжы каля рэстарацыі «Поедем поедим»
ФОТА: TUT.BY

Абаронцы Курапатаў прадаўжаюць штодзённую вахту.

У ноч на 13 чэрвеня невядомыя павалілі крыжы, якія абаронцы Курапатаў выставілі ля праезду праз ахоўную зону ў рэстарацыю «Поедем поедим», размешчаную ў 50 метрах ад мемарыяла.

Як распавёў «Радыё Свабода» адзін з лідараў пратэсту, сустаршыня Беларускай хрысціянскай дэмакратыі Павел Севярынец, актывісты падазраюць, што крыжы павалілі супрацоўнікі рэстарацыі - пратэстоўцы ставілі іх як раз, каб перашкодзіць аўтамабілям з прадуктамі ездзіць «незаконнай» дарогай.

Актывісты прадаўжаюць штодзённую вахту (пратэсты доўжацца з пачатку месяца) і спрабуюць не прапускаць у рэстарацыю аўтамабілі з грузамі, агітуюць наведвальнікаў не хадзіць у «кабак на костках», як яны называюць «Поедем поедим». Сёння да пратэсту далучыліся таксама праваабаронцы «Вясны» на чале з Алесем Бяляцкім, якія разгарнулі расцяжку «Курапаты - месца злачынства і смутку».

Было: вечар 12 чэрвеня
Стала: дзень 13 чэрвеня

«Сёння апоўдні ў Курапатах сабраліся чалавек дваццаць, прыехалі людзі з рэгіёнаў, з Бабруйска, з Віцебска, - расказвае Севярынец. - Дзесьці а 12.30 пачаліся інцыдэнты. Смеццявоз і машына з прадуктамі спрабавалі праехаць на тэрыторыю «Бульбаш-хола», шэсць супрацоўнікаў міліцыі і ДАІ спрабавалі зрушыць пратэстоўцаў з праезду.

Дайшло і да штурханіны, на зямлю павалілі Тацяну Севярынец, але адступілі, не змаглі людзей адштурхнуць. Аформілі два пратаколы на мяне і на Аляксандра Туровіча за парушэнне правілаў дарожнага руху».

Вечарам 12 чэрвеня Туровіча затрымалі на выхадзе з Курапатаў, ноч ён правёў у пастарунку, раніцай быў адпушчаны з міліцыі пасля складання трох пратаколаў - абвінавацілі ва ўдзеле ў несанкцыянаваным мерапрыемстве, дробным хуліганстве і перашкодзе працы грамадскай установы.

Напомнім 31 траўня затрымалі актывістку і рэжысёрку Вольгу Нікалайчык падчас пікету супраць адкрыцця рэстарацыі «Поедем поедим». 7 чэрвеня па дарозе з Курапатаў на дзве гадзіны затрымалі Паўла Севярынца і Вольгу Нікалайчык. 8 чэрвеня затрымалі Дзяніса Урбановічa і Вольгу Нікалайчык.

Напісаць каментар 11

Таксама сачыце за акаўнтамі Charter97.org у сацыяльных сетках