Беларусы змагаюцца за захаванне дзіцячага дома і школы пад Віцебскам

Велікалётчанскі дзіцячы дом – самы буйны ў Беларусі.

На платформе «Зручны горад» апублікаваная петыцыя з просьбай не зачыняць дзіцячы дом і школу ў вёсцы Вялікія Лётцы пад Віцебскам, піша tut.by.

Аўтары петыцыі просяць адмяніць пастанову мясцовых уладаў пра закрыццё школы і дзіцячага дома ў Вялікіх Лётцах, якое чакае гэтыя ўстановы адукацыі з верасня 2018 года. Сабраныя подпісы плануюць накіраваць у адміністрацыю Лукашэнкі і Міністэрства адукацыі.

Петыцыю на стан раніцы 13 чэрвеня падпісалі больш за 1100 чалавек.

«Управай адукацыі Віцебскага аблвыканкама вызначанае закрыццё дзіцячага дома і школы ў вёсцы Вялікія Лётцы Віцебскага раёна. Частку дзяцей плануюць уладкаваць у прыёмныя сем'і, астатніх перавесці ў іншыя дзіцячыя дамы. На думку мясцовых уладаў, дзецям у прыёмных сем'ях будзе больш камфортна, бо ўмовы іх пражывання будуць максімальна набліжаныя да хатніх. Матэрыяльны бок пастановы пра закрыццё дзіцячага дома – адсутнасць бюджэтнага фінансавання на ягонае ўтрыманне», – гаворыцца ў петыцыі.

Нагадаем, Велікалётчанскі дзіцячы дом – самы буйны ў Беларусі: тут жывуць 84 выхаванцы ад 6 да 17 гадоў. Толькі шасцёра з усіх выхаванцаў – біялагічныя сіроты. Астатнія – сацыяльныя, гэта значыць у іх жывыя бацькі.

Дзіцячы дом незвычайны: тут выхавальнікі ўважаюць абавязковым уз'яднанне родных братоў і сясцёр, якіх да гэтага забралі ў бацькоў, напрыклад, алкаголікаў, і аддалі ў розныя інтэрнаты.

Выхаванцы жывуць у сямі групах-сем'ях, колькасцю 10–12 чалавек. У групе працуюць два выхавальнікі – мужчына і жанчына, гэта значыць «тата» і «мама». І 40% з іх – шлюбныя пары.

Зачыніць дзіцячы дом хочуць «у мэтах аптымізацыі». Дзяцей маюць намер перавесці ў іншыя інтэрнатныя ўстановы – меншыя. Пры гэтым многія выхаванцы ўжо не раз «курсіравалі» з дзіцячага дома ў дзіцячы дом.

Базавую школу ў Вялікіх Лётцах зачыняюць у сувязі з тым, што ліквідуюць дзіцячы дом. Амаль усе яе вучні – дзіцдомаўцы: 77 чалавек з 85. А раз у вёсцы не стане дзіцячага дома, то, атрымліваецца, школа таксама лішняя. Васьмёх «хатніх» дзяцей – тых, у каго ёсць сем'і, – з 1 верасня будуць вазіць у школы або ў Віцебск, да якога прыкладна 10 км, або ў аграгарадок Кіраўскі, або ў вёску Старое Сяло – яны размешчаныя за 5–7 км ад Вялікіх Лётцаў.