Беларусы жывуць у чаканні значнага росту коштаў
5- 10.06.2018, 13:27
- 15,943
Інфляцыйныя чаканні сталі праблемай №1.
У Беларусі растуць інфляцыйныя чаканні насельніцтва. Гэта вынікае з агучаных Нацбанкам звестак за травень. Толькі пятая частка беларусаў - 20,4% - мяркуюць, што ў найбліжэйшыя 12 месяцаў інфляцыя будзе расці павольней, чым цяпер. Астатнія апытаныя перакананыя, што рост коштаў тавараў і паслуг паскорыцца і будзе такім жа інтэнсіўным, як цяпер.
Для параўнання: у лютым гэтага года 23,9% беларусаў меркавалі, што ў найбліжэйшыя 12 месяцаў тэмпы інфляцыі знізяцца. А ў лістападзе мінулага года такога меркавання прытрымлівалася 19,5% насельніцтва.
Вырасла колькасць беларусаў, якія думаюць, што цяпер не самы спрыяльны час для буйных набыткаў. У траўні такога меркавання прытрымлівалася 66,3% апытаных, а ў лютым - 65%.
Павялічылася колькасць беларусаў, у якіх за апошнія 3 месяцы не было буйных набыткаў - 48,1% у траўні супраць 45,4% у лютым.
Нагадаем, у сакавіку Лукашэнка даручыў ураду знізіць інфляцыйныя чаканні беларусаў, якія былі высокімі.
Тады дыктатар заявіў, што «ведае, што стаіць за гістарычна нізкім узроўнем інфляцыі», але назваў рост коштаў праблемай №1.
Аналітыкі ЕАБР чакаюць, што сёлета ў Беларусі адбудзецца некаторае паскарэнне інфляцыі. «Адкладзены эфект росту заробку і пашырэння крэдытавання на фоне захавання высокіх інфляцыйных чаканняў стане фактарам некаторага паскарэння інфляцыйных працэсаў у 2018 годзе», гаворыцца ў паведамленні.