Тое, што робяць улады перад пасяўной - гэта феадалізм

Эканаміст расказаў аб галоўнай прычыне неэфектыўнасці сельскай гаспадаркі ў Беларусі.

Кіраўнік аналітычнага цэнтра «Стратэгія» Леанід Заіка ў экспрэс-каментары «Салiдарнасцi» выказаўся пра маштабную хвалю праверак Камітэта дзяржаўнага кантролю на розных аграрных прадпрыемствах Беларусі.

Напрыклад, КДК распачаў 49 крымінальных спраў праз розныя парушэнні, выяўленыя перад пачаткам пасяўной.

- Яшчэ 200 гадоў таму назад Карл Маркс пісаў, што ёсць дысцыпліна працы, а ёсць дысцыпліна прымусу, - адзначыў эканаміст. - Даўно вядома, што пры капіталізме існуе эканамічны прымус да працы, а пры феадалізме існуе неэканамічны прымус да працы. Дык вось тое, чым займаецца Камітэт дзяржаўнага кантролю - гэта феадалізм.

На думку Заікі, да пасяўной «людзей павінны штурхаць меркаваныя прыбыткі, якія можна выдаткаваць на куплю аўтамабіля ці паездку на Балі з каханай жонкай», а не праверкі.

- Калі ў нейкай гаспадарцы закапалі ўгнаенні ў зямлю, то гэта зрабілі дурні. Калі б яны гэтыя ўгнаенні прадалі, скажам, у дружалюбны Казахстан або ў брацкую Арменію - і зарабілі грошы, то гэта былі б больш разумныя людзі. Так што, я нічога не маю супраць, каб праводзіць селекцыю сярод такіх непісьменных кіраўнікоў, - з іроніяй дадаў ён.

Характарызуючы стан беларускай сельскай гаспадаркі, эканаміст прывёў у прыклад «дзіўную рэч»:

- Неяк на вакзале ў Менску зайшоў у шапік, у якім прадаюць арэхі і сушаную садавіну. І што я там бачу? Ляжаць сушаныя журавіны вытворчасці ЗША. Другая прапанова - журавіны ў цукры - вытворчасць РФ. Я пытаюся жанчыну, якая гэтымі журавінамі гандлюе: а ў Беларусі наогул журавіны растуць? Яна адказвае: напэўна, не растуць. Дык вось мяне не цікавіць, што там робіць КДК, што робіць прэзідэнт... Мяне цікавіць, як амерыканская журавіны дабралася да беларусаў. Хлопцы, што вы далей будзеце рабіць?

На думку Леаніда Заікі, выхад з цяперашняй сітуацыі «самы просты»: «Аддаць людзям зямлю і не перашкаджаць ім працаваць».

- Шмат кажуць пра малую радзіму: урад хоча, каб мы клапаціліся пра вёску, раёны. Пры ўсім тым, што зямля там не наша, заводы не нашы...

Нашаму кіраўніцтву трэба задумацца пра тое, чаму беларусы не могуць быць гаспадарамі ў сваёй краіне. І ніякія праверкі тут не дапамогуць. Усё гэта мы ўжо праходзілі ў часы Савецкага Саюза - нічога не змянілася, - падсумаваў суразмоўца.