Сямашка: Павышэнне коштаў паліва непазбежнае

У гэты момант Сямашка вызначаецца з тактыкай павышэння коштаў.

Канчатковага развязання аб тактыцы змены коштаў паліва пакуль няма. Такое меркаванне выказаў журналістам намеснік прэм'ер-міністра Уладзімір Сямашка, паведамляе БелТА.

«За апошнія паўтара месяца кошт нафты павысіўся на 30%, было $60 за барэль, а сёння - $80. Сродкі, накіраваныя на мадэрнізацыю НПЗ, трэба будзе потым «адбіваць», абслугоўваць крэдыты. Гэта трэба рабіць за кошт прыбытку. Таму падвышэнне [коштаў на паліва] непазбежнае, іншая справа - якая будзе тактыка. Ёсць розныя меркаванні на гэты конт. Пакуль канчатковага развязання няма», - сказаў Уладзімір Сямашка.

Нагадаем, напярэдадні кіраўнік «Белнафтахіма» Ігар Ляшэнка распавёў, што пры цяперашніх коштах нафты бензін падаражэе амаль на 24%. «Пры $80 за барэль парытэтны кошт ва ўмовах нашага ўнутранага рынку на бензін 92 і 95 будзе ўкладвацца ў дыяпазон ад 80 да 85 цэнтаў за 1 літр (ад 1,6 да 1,7 рубля). Гэтыя лічбы дастасавальныя і да коштаў Расейскай Федэрацыі», - растлумачыў старшыня «Белнафтахіму».

Ён таксама заявіў, што пры змене кошту барэля ў большы або меншы бок прапарцыйна будзе адбывацца і змяненне коштаў на аўтамабільнае паліва. Калі цяперашні кошт барэля нафты захаваецца, то раздробныя кошты аўтамабільнага паліва будуць падцягвацца да названага ўзроўню.

Як раней паведамлялася, у Расеі за апошні тыдзень рэзка выраслі кошты на паліва - яно падаражэла амаль на адзін расейскі рубель (блізу 3 капеек у пераліку).

Да прыкладу, кошты на бензін на маскоўскіх аўтазапраўках за тыдзень з 21 да 27 траўня выраслі на 88-90 капеек. Пры гэтым кошт паліва маркі АІ-92 павялічыўся на 90 капеек - да 42,21 рубля за літр (1,36 рубля), а кошт на бензін маркі АІ-95 дадаў 88 капеек і дасягнуў 45,5 рубля (1,47 рубля) . Калі параўноўваць з Беларуссю, то на 29 траўня ў нас АІ-92 і АІ-95 каштуюць 1,29 і 1,37 рубля адпаведна.