Беларуска атрымала прызнанне ў ЗША за поспехі ў музыцы
2- 23.05.2018, 20:30
- 13,039
Амерыканская акадэмія мастацтваў і літаратуры назвала Алу Барзову «сілай на музычнай сцэне ЗША».
Лютэранская царква святога Міхаіла ў горадзе Новы Ханаан, штат Канектыкут, зрабіла 6 траўня сваім новым музычным кіраўніком беларуску Алу Барзову, паведамляе belmir.by.
Як паведаміў сайт гэтай рэлігійнай установы, адбылося гэта «пасля доўгіх пошукаў, інтэрв'ю і аўдзіравання».
У царкве гавораць, што Ала «прынясе з сабой свой талент разам з багатым досведам канцэртнай арганісткі і піяністкі, вакалісткі, вядомай у свеце кампазітаркі, хормайстаркі і выкладчыцы».
Як сказана ў біяграфіі, Барзова абараніла доктарскую ў Маскоўскай кансерваторыі імя Чайкоўскага, а пасля прыезду ў ЗША ў 1993 годзе працягнула навуковую працу ў Нью-Ёрку.
У апошнія 25 гадоў яна была музычнай кіраўніцай у цэрквах пяці веравызнанняў: лютэранскай, епіскапальнай, аб'яднанай метадысцкай, прэсвітэрыянскай і евангелісцкай.
Таксама беларуска працавала ў Грамадзянскім тэатры Алентауна ў Пенсільваніі, рыхтуючы музычныя партыі для мюзіклаў і кіруючы прафесійным аркестрам.
У актыве Алы - пасада ў Муленбергскім каледжы гэтага ж штата. Тут яна, між іншым, напісала арыгінальны балет, натхнёны малюнкамі Гойі.
На працягу 17 гадоў Барзова выкладала ў Маскоўскай кансерваторыі, у спецыяльнай музычнай школе Беларускай акадэміі музыкі і іншых установах.
У яе рэпертуары - многія напрамкі ад класікі да сучаснасці, уключаючы спірычуэлз, джаз, госпел. За музыку ўласнага сачынення беларуска атрымала мноства ўзнагарод.
Амерыканская акадэмія мастацтваў і літаратуры назвала Алу «сілай на музычнай сцэне ЗША», дадаўшы, што «кожная нота, напісаная ёю, поўная моцы і адкрытасці, якая дзівіць і хвалюе адначасова».
На старонцы Алы Барзовай у Facebook сказана, што родам яна з Менска, цяпер жыве ў горадзе Пелхэм штата Нью-Ёрк. У шлюбе з Аляксандрам Дзмітрыевым, ёсць дачка Лада.