Выпускныя вечары ў Беларусі пройдуць «за зачыненымі дзвярыма»

Учорашнім школьнікам забаронена будзе асабіста пакідаць месца святкавання.

Падчас правядзення выпускных вечароў, якія адбудуцца 9 чэрвеня, учорашнім школьнікам забаронена будзе асабіста пакідаць месца святкавання. Каб гэта зрабіць, яны павінны заручыцца падтрымкай бацькоў або законных прадстаўнікоў, паведамляе interfax.by.

Такія жорсткія правілы, са слоў чыноўнікаў, выкліканыя выключна клопатам пра падлеткаў і іх бяспеку.

«Кіраўнікі ўстаноў і ўпраўленняў адукацыі нясуць адказнасць за кожнае дзіця. Таму на этапе падрыхтоўкі праводзіцца тлумачальная праца і з бацькамі, і з дзецьмі, каб яны з разуменнем паставіліся да захадаў бяспекі», - патлумачыла падчас прэс-канферэнцыі начальніца аддзела выхаваўчай і ідэалагічнай работы камітэта адукацыі Менгарвыканкама Ганна Рысявец.

Таксама яна адзначыла, што разам з міліцыяй і работнікамі школ, забяспечваць бяспеку дзяцей будуць у гэты вечар бацькі: сярод іх ужо цяпер ствараюцца спецыяльныя бацькоўскія брыгады, якім трэба будзе несці дзяжурства ў прызначаны дзень.

У выпадку, калі каму-небудзь з выпускнікоў не захочацца прысутнічаць на святочным вечары «да пераможнага канца» і ён захоча сысці раней, яму трэба будзе паведаміць пра гэта бацькам альбо законным прадстаўнікам. А тыя, у сваю чаргу, павінны будуць звярнуцца да класнага кіраўніка і напісаць адпаведную заяву з просьбай адпусціць дзіця. Гэтае патрабаванне распаўсюджваецца як на выпускнікоў, якія будуць адзначаць заканчэнне школ у сваіх установах адукацыі, так і на тых, хто плануе адсвяткаваць «у горадзе».