Беларускія маршрутнікі: Мы пакуль у шоку

Вознікі працуюць у страту праз дэмпінг коштаў.

У адказ на зніжэнне менскімі вознікамі кошту праезду са Слуцка ў Менск і назад мясцовыя маршрутнікі ўстанавілі новы кошт. Таксама 2 рублі. Са звестак «Кур'ера», ніякіх дамоўленасцяў паміж слуцкімі фірмамі і менчукамі не было.

Некаторыя маршрутнікі сёння працуюць у страту праз дэмпінг. Што яны кажуць?

У пятніцу, 11 траўня, стала вядома, што новы перавозчык ПГУП «Флешэкспрэс» знізіў кошты на праезд у маршрутках. З 14 траўня 2018 года яны ўстанавілі новы кошт на праезд з Менска ў Слуцк і са Слуцка ў Менск - усяго 2 рублі. Спачатку мясцовыя кіроўцы не планавалі зніжаць кошт праезду, але ўчора ўсё ж паведамілі пра акцыю.

«Кур'ер» пагаварыў з прадстаўнікамі мясцовых маршрутак і даведаўся, што яны думаюць наконт сітуацыі, якая склалася.

Аляксей, кіроўца мясцовай фірмы

Пра новы кошт Аляксей даведаўся толькі ўчора вечарам. Кіроўца патлумачыў: для таго, каб маршрутка працавала не ў страту, а «ў нуль», нічога не зарабляючы, кошт за паездку павінна быць прыкладна 3 рублі. Вазіць пасажыраў за 2 рублі - працаваць у страту. «Я пакуль у шоку», - сказаў ён.

Андрэй Адамчук, кіроўца фірмы «999»

Андрэй пацвердзіў, што маршруткі працуюць у страту. Што будуць рабіць кіроўцы, калі такі кошт пратрымаецца некаторы час, ён не ведае.

Алег, кіроўца адной з мясцовых фірмаў

Алег выказаў здагадку, як можна выйсці з гэтай сітуацыі: «Калі праца ў страту, мы можам дома пасядзець. Яны паездзяць месяц-два, потым падымуць кошт, і тады мы паедзем».

Яшчэ адно выйсце з сітуацыі, якая склалася, на думку Алега, - адкрыццё слуцкімі маршруткамі новых кірункаў, дзе мясцовыя фірмы будуць канкураваць з менскай.

Як змагаюцца з дэмпінгам коштаў у Салігорску

У Салігорску дэмпінг пачаўся сёння. Два перавознікі ад «Мінаблпасажыртрансу» возяць маршрутам «Салігорск-Менск-Салігорск» за 4 рублі ў адзін бок. Раней за праезд пасажыры плацілі 6 рублёў.

Паводле інфармацыі «Кур'ера», салігорскія фірмы, не зарэгістраваныя ў «Мінаблпасажыртрансе», таксама плануюць адказаць на дэмпінг, але не так, як у Слуцку.

Адрозненне ў тым, што ў Слуцку аўто ад «Мінаблпасажыртрансу» ездзяць кожную гадзіну, а ў Салігорску яны ходзяць значна радзей, чым мясцовыя маршруткі. Таму ў Салігорску мясцовыя вознікі знізяць кошты толькі на тых рэйсах, якія па часе супадаюць з рэйсамі менчукоў.

Валерый, прадстаўнік салігорскай маршрутнай сеткі, сказаў, што салігорцы будуць працаваць да канца, і дэмпінг ім не важны.