Сем дзён Пашыняна: што атрымалася ў прэм'ер-міністра Арменіі

Тыдзень таму армянская рэвалюцыя паставіла на чале краіны новага палітыка.

Што за гэты час удалося зрабіць лідару «аксамітнай рэвалюцыі» і як ацэньваюць ягоныя дзеянні экспэрты — у матэрыяле Deutsche Welle.

За тыдзень на пасадзе прэм'ер-міністра Нікол Пашынян паспеў замяніць усіх міністраў, звольніць найбольш скандальна вядомых чыноўнікаў і генералаў, уключаючы начальніка паліцыі Арменіі і камандзіра ўнутранымі войскамі і зрабіў адкрытымі пасяджэнні ўрада. Ён таксама распарадзіўся палепшыць правілы мытнага рэгулявання і ўзяў удзел у саміце ЕАЭС у Сочы, дзе сустрэўся з Уладзімірам Пуціным.

Змена стылю армянскай палітыкі

Першае, што, кажучы пра пачатак прэм'ерства Нікола Пашыняна, у адзін голас адзначаюць назіральнікі, — змена атмасферы ў краіне. Тут ніколі не бачылі, як міністры карыстаюцца грамадскім транспартам, а прэм'ер-міністр прыходзіць на працу пешшу. Праўда, цяпер яго знакаміты заплечнік носіць за Пашынянам адзін з целаахоўнікаў. Цалкам змяніўшы склад урада Арменіі, ён увёў у новы Кабінет міністраў маладых людзей — тых, хто падтрымаў яго ў барацьбе супраць старой улады, і менавіта яны, на задуму Пашиняна, узначаляць барацьбу з карупцыяй у краіне.

Прэм'ер абяцаў, што людзі адчуюць змены ў сваім жыцці ў самы найбліжэйшы час. Першыя яго загады закранулі працу мытняў, ён запатрабаваў значна паскорыць працэдуры афармлення тавараў на мяжы і ліквідаваць манаполіі — цяпер кожны грамадзянін Арменіі ў рамках законаў можа ўвозіць у краіну ўсё, што палічыць патрэбным. Раней, да прыкладу, дызпаліва, бензін, цукар, бананы ўвозіліся манапалістамі. На чарзе — абнуленне ўсіх штрафаў за пратэрмінаваныя сельскагаспадарчыя і спажывецкія крэдыты, а таксама зніжэнне сумы штрафаў за парушэнні ПДР.

У панядзелак, 14 траўня, Пашынян здзейсніў свой першы замежны візіт — на саміт ЕАЭС у Сочы. Там ён сустрэўся з прэзідэнтам Расеі Уладзімірам Пуціным і ў размове з ім пацвердзіў гатоўнасць Ерэвана да выканання міжнародных абавязанняў, уключаючы ЕАЭС. «Арменія настроеная на актыўнае ўзаемадзеянне з партнёрамі з ЕАЭС у інтарэсах практычнага дасягнення свабоды перамяшчэння тавараў, паслуг, рабочай сілы і капіталу, а таксама ўкаранення льготных рэжымаў эканамічнага супрацоўніцтва», — запэўніў Пашынян.

Праца прэм'ера Пашыняна ў рэжыме онлайн

Штодня бліжэй да паўночы прэм'ер-міністр на сваёй старонцы ў Facebook распавядае людзям пра тое, што ён зрабіў за мінулы дзень. Такой адкрытасці і непасрэднасці ад яго ніхто не чакаў. Кіраўнік урада паказаў свой працоўны кабінет і паабяцаў зрабіць гэта з асабняком, у якім будзе жыць — «каб людзі ведалі, на што ідуць грошы падаткаплатнікаў».

Паведаміўшы аб новых прызначэннях ва ўрадзе, ён тлумачыў, чаму менавіта гэты чалавек узначаліў тое ці іншае міністэрства або ведамства. Кожны дзень Пашынян распавядае, якія даручэнні даў чыноўнікам для паляпшэння сітуацыі ў той ці іншай сферы. На думку назіральнікаў, лідар «аксамітнай рэвалюцыі» так дае справаздачу перад народам, дзякуючы намаганням і волі якога ён стаў галоўнай палітычнай фігурай у краіне.

Інвентарызацыя ўнутры і за межамі Арменіі

Пашынян закончыў фармаванне новага ўрада, галоўная задача якога — пераадоленне глыбокага палітычнага і эканамічнага крызісу з дапамогай сістэмных рэформаў, заявіў экспэрт Армянскага цэнтра палітычных і міжнародных даследаванняў Рубэн Меграбян, ацэньваючы першыя крокі новага прэм'ера.

Тыдзень, вядома, не той тэрмін, па выніках якога можна рабіць нават папярэднія высновы. «Тым не менш маладая амбіцыйная каманда, першыя заявы, імкненне да пастаяннага падтрымання зваротнай сувязі з грамадзянамі, праца ад світання да заходу — усё гэта кажа аб зацятасці і накіраванасці на вынік, які, думаю, апраўдае чаканні грамадства», — прагназуе экспэрт.

Ён таксама пазітыўна ацаніў удзел Пашыняна у саміце ЕАЭС і сустрэчу з Пуціным. «Арменіі патрэбна замежная палітыка зусім іншага ўзроўню — у дачыненні да Еўразвязу, Расеі, ЗША, Ірана, Кітая, Індыі, Ізраіля, арабскага свету, якая стане арганічным працягам унутранай палітыкі новай якасці. І ва ўмовах нестабільнага і зменлівага свету, так, гэта можа быць толькі актыўная палітыка, заснаваная на прынцыпе «інтарэсы Арменіі — перш за ўсё», — паказвае Меграбян.

Галоўнае пытанне — датэрміновыя выбары ў парламент

На думку палітолага Мікаэла Заляна, у Пашыняна цяпер складаны перыяд. Перш за ўсё таму, што пакуль нельга сказаць, што ў яго ёсць паўната ўлады, «у рэспубліканцаў усё яшчэ большасць у парламенце, яны кантралююць шэраг важных пасад, у тым ліку, напрыклад, пасаду мэра Ерэвана, але адказнасць за краіну ўжо ляжыць на прэм'еры і ягонай камандзе».

Са слоў Заляна, пакуль цяжка казаць аб канкрэтных зменах у асобных сферах, але ёсць адна, дзе падыходы новай улады кардынальна адрозніваюцца ад ранейшай. «Пашынян і ягоная каманда прынцыпова інакш падыходзяць да камунікацыі з грамадствам — сам прэм'ер і новапрызначаны міністры раз на дзень звяртаюцца да грамадзян праз Live-відэа ў Facebook і іншых сацсетках, рэагуюць на крытыку на свой адрас, а першае пасяджэнне новага ўрада транслявалася ў жывым эфіры», — растлумачыў Залян.

Тым часам у Ерэване і іншых рэгіёнах Арменіі доўжацца акцыі пратэсту супраць старой улады. Так, незадаволеныя пікетуюць сталічную мэрыю і будынак Генпракуратуры, патрабуючы адстаўкі мэра і генпракурора. Назіральнікі ўпэўненыя, што яшчэ будуць новыя кадравыя перастаноўкі. Але галоўным пытаннем яны па-ранейшаму называюць неабходнасць правядзення пазачарговых выбараў у парламент Арменіі.