Заўтра ў Беларусі зноў падаражэе паліва

Сёлета кошты аўтапаліва павялічваліся 25 разоў.

З 9 снежня 2018 года на аўтазаправачных станцыях Рэспублікі Беларусь кошт бензіну АІ-92-К5-Еўра складзе Br1,43, АІ-95-К5-Еўра - Br1,53, АІ-98-К5-Еўра - Br1,74, ДТ - Br1,53, паведамляе прэс-служба канцэрна «Белнафтахім», паведамляе «Інтэрфакс».

Такім чынам, кошт кожнага тыпу паліва павысіцца з названай даты на 1 капейку.

За лістапад 2018 года сярэдняя каціроўка нафты маркі Brent склала $64,7, агулам за 11 месяцаў 2018 года - $72,1 - за барэль, адзначаюць прадстаўнікі канцэрна.

«Кошт нафты, якая пастаўляецца на беларускія НПЗ, за студзень - лістапад 2018 года павялічыўся ў дачыненні да аналагічнага перыяду мінулага года ў даляравым эквіваленце на 32 адсоткі, у рублёвым - на 39 адсоткаў. Кошты маторнага паліва з пачатку года павялічаныя на 18,8 адсотка. Такім чынам, для айчынных нафтаперапрацоўчых заводаў захоўваецца апераджальны рост коштаў нафты ў параўнанні з коштамі нафтапрадуктаў», - гаворыцца ў паведамленні.

Сёлета ў Беларусі кошты аўтапаліва павялічваліся 25 разоў, як правіла, на 1 капейку. Апошняе падаражанне адбылося 25 лістапада.