Кітай упершыню адправіў месяцаход на адваротны бок Месяца

На борце станцыі знаходзіцца камера для здымкі, а таксама прыбор для вымярэння выпраменьвання.

Кітай стаў першай краінай, якія адправілі касмічны апарат для даследавання таго боку Месяца. З касмадрома Січан у ноч на суботу, 8 снежня, паводле кітайскага часу была запушчана ракета, якая павінна даставіць на Месяц місію «Чан'э-4» - праект Кітайскага нацыянальнага касмічнага кіравання, піша dw.com.

Месяцаход павінен прызямліцца на вялікім кратары Эйткен, названым у гонар амерыканскага астранаўта Роберта Эйткена, пішуць кітайскія СМІ. На борце станцыі «Чан'э-4» знаходзіцца камера для здымкі, а таксама прыбор для вымярэння выпраменьвання, выраблены ва ўніверсітэце нямецкага горада Кіля. Апарат апынецца на Месяцы, як мяркуецца, праз чатыры тыдні, і будзе адпраўляць звесткі вымярэнняў прама ў Кіль.

Кітай плануе пілатуемую місію на Месяц

У гутарцы з карэспандэнтам DW прафесар фізікі ўніверсітэта Роберт Вімер-Швайнгрубер (Robert Wimmer-Schweingruber) выказаў здагадку, што КНР стане наступнай краінай, якая пасля ЗША і Расеі таксама адправіць на Месяц сваю місію. «Зробленыя нашым прыборам вымярэнні важныя для падрыхтоўкі такіх місій», - растлумачыў прафесар.

Чан'э - імя багіні з кітайскай міфалогіі, якая жыве на Месяцы. У рамках місіі «Чан'э-3» касмічны зонд без экіпажа высадзіўся на Месяц у 2013 годзе. Кітай плануе адправіць сваю першую пілатуемую місію на Месяц у найбліжэйшае дзесяцігоддзе. Калі гэтыя планы будуць ажыццёўлены, яны могуць спрыяць супрацоўніцтву Паднябеснай з Еўрапейскім касмічным агенцтвам ESA, заяўляў яго гендырэктар Ёхан-Дзітрых Вёрнер (Johann-Dietrich Wörner) у інтэрв'ю DW. Дагэтуль астранаўты ESA адпраўляліся ў космас толькі на расейскіх або амерыканскіх караблях.