Трамп падпісаў указ аб стварэнні касмічнага камандавання ЗША

У ЗША афіцыйна з'явілася камандаванне касмічных войскаў.

Прэзідэнт ЗША Дональд Трамп падпісаў указ аб стварэнні камандавання Касмічных сіл Злучаных Штатаў. Заяву пра гэта апублікавала прэс-служба Белага дома, паведамляе РБК.

Кандыдатуры для прызначэння ў камандаванне новых войскаў павінны быць прадстаўлены прэзідэнту міністрам абароны ЗША Джэймсам Мэцісам. Пазней, у адпаведнасці з працэдурай прызначэння, яны павінны быць зацверджаныя сенатам ЗША. Касмічнаму камандаванню павінны быць перададзеныя ўсе паўнамоцтвы аб'яднанага камандавання, звязаныя з выкананнем задач у космасе.

Афіцыйна пра планы стварэння касмічных войскаў ЗША Дональд Трамп абвясціў летам 2018 года. Дагэтуль вайсковыя касмічныя праграмы ў ЗША знаходзіліся ў сферы камандавання ВПС. Амерыканскі прэзідэнт падкрэсліў, што абарона ў касмічнай прасторы з'яўляецца адным з найважнейшых пытанняў нацыянальнай бяспекі. «Калі справа даходзіць да абароны Амерыкі, недастаткова проста мець амерыканскую прысутнасць у космасе. Мы павінны забяспечыць амерыканскае панаванне ў космасе», - заяўляў ён. Амерыканскі прэзідэнт таксама адзначыў, што ЗША запазніліся са стварэннем касмічных войскаў: так, Трамп нагадаў, што стварэннем такіх родаў войскаў ужо актыўна займаюцца Расея і Кітай.

Сярод задач касмічных войскаў Белы дом назваў абарону амерыканскіх спадарожнікаў і інтарэсаў ЗША ў космасе, а таксама адсочванне касмічнага смецця. У Пентагоне таксама заявілі, што пагроза амерыканскім спадарожнікам з боку іншых краін рэальная. Мэціс, каментуючы фармаванне новых войскаў, нагадаў, што ў 2007 годзе Кітай выпрабаваў сродкі разбурэння касмічных апаратаў, знішчыўшы ракетай метэаралагічны спадарожнік. «У нас няма планаў мілітазаванай касмічнай прасторы. Аднак у выпадку неабходнасці мы будзем абараняцца ў космасе», - сцвярджаў ён.