Гомельскі тлушчавы камбінат прызнаны банкрутам

Чатыры гады таму яго акцыі хацелі прадаць народу.

Эканамічны суд Гомельскай вобласці адкрыў конкурсную справу ў дачыненні да ААТ «Гомельскі тлушчавы камбінат» і пачаў падрыхтоўку справы аб банкруцтве да судовага разбору. Гэта вынікае з інфармацыі з адзінага рэестра звестак аб банкруцтве, піша tut.by.

Як вынікае з матэрыялаў суда, справа ініцыяваная на заяву аб эканамічнай неплатаздольнасці самой кампаніі. У Гомельскім аблвыканкаме, які з'яўляецца куратарам прадпрыемства, заявілі, што немэтазгодна далейшае дасудовае аздараўленне прадпрыемства, на якім працуе блізу 600 чалавек.

Крэдыторская запазычанасць «Гомельскага тлушчавага камбіната» перавышае 48,4 млн руб. З іх 32,5 мільёнаў рублёў - гэта кароткатэрміновыя абавязацельствы. Банкі БелВЭБ і «Масква - Мінск» пагадзіліся з тым, што варта пачынаць справу аб банкруцтве. У Белаграпрамбанку меркавалі, што падстаў да ўвядзення санацыi ў дачыненні да завінавачанага не бачыцца.

Кошт маёмасці камбіната ацанілі на 56,7 млн рублёў. З іх 39,6 мільёнаў - гэта асноўныя сродкі.

За 2017 год чыстая страта гомельскай дзяржкампаніі склала амаль 2,8 мільёнаў рублёў.

Зрэшты, улады не збіраюцца пускаць камбінат з малатка. Яны маюць намер праз працэдуру банкруцтва правесці фінансавае аздараўленне прадпрыемства. За кошт механізму санацыі пазыковая нагрузка не будзе ціснуць на «Гомельскі тлушчавы камбінат».

Судовае разбіральніцтва паводле гэтай справы адбудзецца 26 сакавіка 2019 года.

Цікава, што 4 гады таму «Гомельскі тлушчавы камбінат» задумаў так званае «народнае IPO», гэта значыць, абвясціў публічны продаж больш чым 4 млн акцый. Акцыі дадатковай эмісіі рэалізоўваліся фізічным і юрыдычным асобам, рэзідэнтам і нерэзідэнтам Беларусі, без якіх-небудзь абмежаванняў. Аднак гэта поспеху не прынесла. У выніку было прададзена менш за 1% акцый камбіната.

«Гомельскі тлушчавы камбінат» - буйное прадпрыемства ў Гомельскай вобласці. Яно вырабляе маргарын, маянэз, алей, мыла, саламас.