Падаражанне паліва ў РФ можа прывесці да росту коштаў прадуктаў

У сувязі з падаражаннем на 30% выдаткаў на паліва, кошт перавозак можа вырасці на 10%.

У Расеі ў сувязі з падаражаннем паліва для карпаратыўных кліентаў нафтавых кампаній могуць вырасці кошты тавараў паўсядзённага попыту. Як піша «Нямецкая хваля», пра гэта папярэдзілі прэм'ер-міністра РФ Дзмітрыя Мядзведзева расейскія асацыяцыі транспартна-лагістычных, вытворчых і гандлёвых кампаній, паведаміла ў аўторак, 18 снежня, газета «Коммерсантъ», спаслаўшыся на тэкст ліста, накіраванага ва ўрад краіны.

Як адзначаецца ў дакуменце, пасля пастановы ўладаў замарозіць раздробныя і дробнааптовыя кошты паліва нафтавыя кампаніі вызначылі зарабіць на карпаратыўных кліентах, дачыненні з якімі не рэгламентуюцца ўрадам. Напрыклад, «Газпром нафта» ўвяла для такіх кліентаў сервісныя зборы, а іншыя буйныя кампаніі касуюць зніжкі, паведамляюць крыніцы «Коммерсанта». Праз узмацненне жорсткасці карпаратыўных праграм выдаткі на паліва, якія займаюць не менш за 30 адсоткаў у сабекошце паслуг прафесійных аўтаперавозчыкаў, у лістападзе 2018 года выраслі прыкладна на траціну.

Транспартныя кампаніі, гаворыцца ў звароце, працуюць на высокаканкурэнтным і нізкамаржынальным рынку і пры такім росце сабекошту не змогуць утрымліваць кошты. Згодна з разлікамі, кошт перавозак у выніку можа вырасці на 10 адсоткаў, што адаб'ецца на росце раздробных коштаў тавараў у гандлёвых сетках.

Замарозілі кошты

Паводле звестак на кастрычнік 2018 года, з пачатку года спажывецкія кошты бензіну ў Расеі выраслі на 9,3%. 11 лістапада віцэ-прэм'ер РФ Дзмітрый Козак абвясціў, што ўсе нафтавыя кампаніі Расеі падпісалі пагадненне, згодна з якім да канца 2018 года кошты паліва будуць замарожаныя на ўзроўні пачатку чэрвеня. У студзені 2019 года нафтавікам дазволена падняць кошты максімум на 1,7 адсотка, а далей - не вышэй, чым на ўзровень інфляцыі (4-4,6 адсотка).