Украіна падоўжыла на год абмежаванні ў гандлі з РФ

Гэтую пастанову Кабінет міністраў краіны прыняў без абмеркавання.

Кабінет міністраў Украіны на пасяджэнні ў аўторак падоўжыў да 31 снежня 2019 года ўключна дзеянне эмбарга на шэраг тавараў з Расейскай Федэрацыі і ўвазной мыты ў дачыненні да іншых расейскіх тавараў, уведзенага ў пачатку 2016 года ў адказ на адпаведныя гандлёвыя забароны і абмежаванні РФ у дачыненні да Украіны.

Адпаведную пастанову Кабмін прыняў без абмеркавання на пасяджэнні ў аўторак, паведамляе «Інтэрфакс-Україна».

У праекце ўрадавай пастановы, якім валодае агенцтва, паказваецца: гэты захад прадоўжаны ў сувязі з прадаўжэннем гандлёвых абмежаванняў з расейскага боку.

Акрамя гэтага, дакумент робіць больш жорсткай фармулёўку ўмовы скасавання эмбарга ў адказ, замяніўшы «пасля скасавання забароны на ўвоз на мытную тэрыторыю РФ тавараў сельскагаспадарчага прызначэння...» на вызначэнне «пасля спынення выкарыстання РФ дыскрымінацыйных ці недружалюбных дзеянняў у дачыненні да Украіны».

Як паведамлялася, згодна з пастановай урада Украіны ад 30 снежня 2015 года, з 2 студзеня 2016 года ў рамках захадаў у адказ да ўсіх тавараў паходжаннем з Расеі выкарыстоўваюцца стаўкі ўвазной мыты, устаноўленыя Мытным тарыфам Украіны. Пры гэтым прэферэнцыйны рэжым у дачыненні да РФ (свабодны гандаль) касуецца ў сувязі з парушэннем Расейскай Федэрацыяй дамовы аб зоне свабоднага гандлю ад 18 кастрычніка 2011 года.

У пералік расейскіх тавараў, якія трапілі пад украінскае эмбарга, уваходзяць мяса, рыба, крупы, збожжа, хлебабулачныя вырабы, гарэлка, піва, цыгарэты, кандытарскія вырабы, кармы, шэраг хімікатаў і чыгуначнага абсталявання.

Расейскае харчовае эмбарга дзейнічае для ўкраінскіх тавараў з 1 студзеня 2016 года.