Брамнік «Віцебска» Андрэй Шчарбакоў загінуў у аўтакатастрофе разам з жонкай і дзіцем

Аўтамабіль занесла на сустрэчную паласу.

Галкіпер «Віцебска» Андрэй Шчарбакоў загінуў у аўтакатастрофе, паведамляе pressball.by.

Разам з 27-гадовым футбалістам загінулі ягоная жонка і дзіця.

Як паведамляе афіцыйны сайт УУС Віцебскага аблвыканкама, аварыя адбылася 17 снежня пад сем гадзін вечара. Легкавы аўтамабіль Kia на 543-м кіламетры трасы М1 занесла. Аўто вылецела на сустрэчную паласу, дзе сутыкнулася з эвакуатарам Mercedes. Усе загінуўшыя - з Kia. Паведамляецца, што ў аўто ехала сям'я: муж з жонкай і двое дзяцей. Дарослыя, а таксама іх шасцігадовы сын загінулі на месцы. Другое дзіця, якое везлі ў дзіцячым аўтакрэсле, выжыла. Цяпер яно ў лякарні. Гібель Андрэя Шчарбакова пацвердзіла прэс-служба «Віцебска».