«Міліцыянт папярэдзіў: Скажаш, што білі - жывога закапаем»

Стала вядома пра бязмежжа ганцавіцкай міліцыі.

Жыхар Ганцавіч Павел Высоцкі быў асуджаны раённым судом за наўмыснае прычыненне цяжкага цялеснага пашкоджання. Але па маладосці гадоў ад адбыцця пакарання, не звязанага з пазбаўленнем волі, ухіляўся, хаваўся ў інтэрнатах. Затым 8 студзеня 2015 года быў суд, які адмераў Паўлу 6 гадоў узмоцненага рэжыму. У папраўчай калоніі №15 горада Магілёва высветлілася, што ў Паўла праблемы са здароўем і яму давялося рабіць аперацыю, паведамляе spring96.org.

Разбіраючыся ў праблемах Паўла, яго прыёмны бацька Іван Рыгоравіч Высоцкі даведаўся, што сына моцна збілі. А датычная да гэтага родная ганцавіцкая міліцыя.

Распавядае Іван Высоцкі:

«У снежні 2016 года я павёз у Магілёў свайму сыну ў ВК-15 рэчавую перадачу. Спатканне з ім не далі, таму, перадаўшы кантралёрам калоніі рэчы, я вярнуўся назад.

Але праз некалькі дзён мне патэлефанаваў сын:

«Тата! Мне зрабілі аперацыю. Праз спайку кішак».

Праз месяц, ужо ў сярэдзіне студзеня 2017 года, я паехаў да яго на доўгае спатканне. Мне ўдалося пагаварыць з начальнікам медслужбы калоніі маёрам Данілавым. Ён мяне чамусьці пачаў распытваць пра тое, ці білі калі-небудзь сына ў жывот, ці праходзіў ён лячэнне. Я адказаў, што Пашу ніхто ніколі не біў і ніколі ён не хварэў».

Павел пры спатканні ўстрымаўся, а можа і баяўся, гаварыць з бацькам на тэму аперацыі на страўніку і толькі ў красавіку 2017 года ў тэлефоннай размове прызнаўся, што быў жорстка збіты раней, яшчэ да суда.

Ён распавёў бацьку, што гэта адбылося 9 лістапада 2014 года ў інтэрнаце Ганцавіцкага ККД на вуліцы Чайкоўскага. Увечары, пасля 18 гадзін, яго некалькі разоў ударыў рукамі і нагамі ў жывот старэйшы лейтэнант крымінальна-выканаўчай інспекцыі В. Дунаеў, а дапамагаў яму пры збіцці ягоны сваяк Аляксей Толчаны.

«Ну як і за што яго так білі? Не можа такога быць!» - усклікае Іван Высоцкі.

«Якая бойка? Бо на самай справе ён быў проста збіты Дунаевым, які быў пры гэтым у нецвярозым стане. Як потым высветлілася, яго вазілі на медыцынскі агляд, які ўстанавіў наяўнасць у крыві 1.5 праміле алкаголю.

Суддзя пытаўся падчас суду ў сына: «Цябе білі?»

Але ён маўчаў, бо яму пагражалі: «Як скажаш - жывога закапаем».

Даведаўшыся пра гэта, Іван Высоцкі звярнуўся з заявай да начальніка папраўчай калоніі №15, дзе адбывае пакаранне яго прыёмны сын. Ён і пацвердзіў 30 лістапада 2016 года пісьмова, што аперацыю праводзілі менавіта праз спайку кішэчніка.

Бацька вырашыў дамагчыся справядлівасці ў дачыненні да сына і напісаў заяву ў Ганцавіцкі райаддзел Следчага камітэта. Старэйшы следчы Ганцавіцкага РАСКа А. Галуза адказаў, што праверка па матэрыяле з паведамленнем аб супрацьпраўных дзеяннях у дачыненні да Паўла Высоцкага прыпыненая ў сувязі з правядзеннем судова-медыцынскай экспертызы.

Расказвае Іван Высоцкі:

«Ужо летам 2017 года я патрапіў на прыём да выканаўцы абавязку намесніка начальніка калоніі ідэалогіі, пытаўся: «Скажыце, яго вазілі на абследаванне?» Але мне адказалі, што такія звесткі не выдаюцца.

Распытваў і начальніка атрада. Ён мне сказаў, што ніхто яго на абследаванне з калоніі не вывозіў. І спецыялісты ў калонію не прыязджалі.

Ну вось каму тут заявішся? Гэта як гарохам аб сцяну...»

А 30 лістапада Івану Высоцкаму адказалі, што вынесена пастанова аб адмове ў распачынанні крымінальнай справы ў дачыненні да супрацоўніка АУС В. Дунаева «ў сувязі з адсутнасцю складу злачынства. Не дапамог і зварот у Магілёўскую пракуратуру.

Абскарджанне неправамерных дзеянняў супрацоўніка АУС Ганцавіцкага раёна працягваецца.

Збіццё затрыманага супрацоўнікам міліцыі - гэта службовае злачынства

Перавышэнне ўлады або службовых паўнамоцтваў - наўмыснае ўчыненне службовай асобай дзеянняў, якія відавочна выходзяць за межы правоў і паўнамоцтваў, дадзеных яму па службе, што пацягнула прычыненне шкоды ў буйнай суме або істотную шкоду правам і законным інтарэсам грамадзян, альбо дзяржаўным або грамадскім інтарэсам.

Наўмыснае ўчыненне службовай асобай дзеянняў, якія відавочна выходзяць за межы правоў і паўнамоцтваў, дадзеных яму па службе, спалучанае з гвалтам, катаваннем ці абразай пацярпелага, караюцца пазбаўленнем волі на тэрмін ад трох да дзесяці гадоў з канфіскацыяй маёмасці або без канфіскацыі і з пазбаўленнем права займаць пэўныя пасады або займацца пэўнай дзейнасцю.