Трамп абвясціў пра адстаўку міністра ўнутраных спраў Раяна Зінке
- 15.12.2018, 18:55
- 7,984
Адстаўка міністра, магчыма, звязана з некалькімі расследаваннямі, якія вядуцца ў яго дачыненні.
Раян Зінке, міністр унутраных спраў ЗША і адзін з ключавых прыхільнікаў Дональда Трампа ў пытаннях экалогіі і здабычы карысных выкапняў, сыдзе ў адстаўку да канца гэтага года. Прэзідэнт ЗША паведаміў пра гэта раніцай 15 снежня ў сваім Твітары, піша «Голос Америки».
«Міністр унутраных спраў Раян Зінке пакіне адміністрацыю ў канцы гэтага года пасля амаль двух гадоў працы. Раян дамогся многага падчас сваёй працы, і я хачу падзякаваць яму за службу на карысць нашай краіне», - напісаў Трамп. Прэзідэнт дадаў, што імя новага міністра будзе абвешчанае на наступным тыдні.
Secretary of the Interior @RyanZinke will be leaving the Administration at the end of the year after having served for a period of almost two years. Ryan has accomplished much during his tenure and I want to thank him for his service to our Nation.......
— Donald J. Trump (@realDonaldTrump) 15 декабря 2018 г.
Як піша New York Times, адстаўка Зінке, хутчэй за ўсё, звязана з цэлым шэрагам расследаванняў, якія вядуцца ў яго дачыненні. Гаворка ідзе пра канфлікт інтарэсаў, звязаных з яго бізнэс-угодамі, аб нямэтавым выкарыстанні бюджэтных сродкаў і аб пастановах, якія ён прыняў, узначальваючы міністэрства.
Зінке, былы кангрэсмэн ад штату Мантана, курыруе пытанні здабычы мінералаў і аховы прыкладна 2 млн кв км федэральных зямель. Цяпер праваахоўныя органы вядуць у дачыненні да яго некалькі расследаванняў, у адным з выпадкаў нагляднае ведамства перадало справу ў Міністэрства юстыцыі ЗША. Магчыма, гаворка ідзе пра крымінальную справу, мяркуе NYT.
Адно з расследаванняў тычыцца ўгоды аб продажы нерухомасці з удзелам найбліжэйшых сваякоў міністра і будаўнічай кампаніі, якой валодае Дэвід Лесар, старшыня рады дырэктараў нафтаздабываючага канцэрна Halliburton. Следства мяркуе, што ў выніку ўгоды Зінке атрымаў нейкі прыбытак, а Halliburton, у сваю чаргу, пралабіяваў пастанову міністэрства, што тычацца правілаў здабычы нафты і газу на тэрыторыі ЗША.
Сам Зінке адмаўляе ўсе абвінавачванні. «Я дзейнічаў у адпаведнасці з усімі працэдурамі, патрабаваннямі і правіламі, і, што самае важнае, у адпаведнасці з законам», - заявіў чыноўнік у красавіцкім інтэрв'ю.
Паводле звестак крыніц NYT, выконваць абавязкі Зінка будзе яго цяперашні намеснік Дэвід Бернхардт. У мінулым ён лабіраваў інтарэсы нафтавых кампаній.