Адток капіталу з Расеі пабіў 3-гадовы рэкорд

Адток капіталу з Расеі прадаўжае паскарацца, пазбаўляючы эканоміку валютных даходаў і імпартных тавараў.

У лістападзе прыватны сектар вывез з краіны 16,3 млрд даляраў, паведаміў ЦБ у аператыўнай ацэнцы аплатнага балансу. Пра гэта піша finanz.ru.

У параўнанні з кастрычнікам адток паскорыўся ў 1,5 разы і стаў рэкордным з лютага 2015 года - піка баявых дзеянняў на Данбасе, калі санкцыі і абрынанне коштаў нафты паставілі на грань неплатаздольнасці найбуйнейшыя дзяржкампаніі - ад «Раснафты» да ЗЭБа.

Назапашаным вынікам за 11 месяцаў адток у 3,3 разы перавысіў леташні, а агульная сума - 58,5 млрд даляраў - выявілася вышэйшай, чым за два папярэднія гады, разам узятыя (25,2 і 18,5 млрд даляраў адпаведна).

Пры гэтым упершыню за год вываз капіталу зраўняўся з прытокам валюты ў існым рахунку, які ЦБ у лістападзе ацаніў на 16,3 млрд даляраў.

Іншымі словамі, 99,3% валютнага прыбытку расейскай эканомікі выцекла за межы рублёвай зоны.

Капітал з Расеі выводзяць нерэзідэнты, распрадаюцца аблігацыі федэральнай пазыкі, а таксама карпарацыі і банкі, якім неабходна выплачваць замежную запазычанасць: у лістападзе, згодна з графікам ЦБ, яны павінны былі выплаціць заходнім крэдыторам 6,7 млрд даляраў у выглядзе выплаты пазык і 1,3 млрд даляраў адсоткаў.

Акрамя таго, у якасці адтоку капіталу ўлічваецца прыбытак сыравінных экспарцёраў, які не даходзіць да расейскіх рахункаў і асядае на Захадзе, нагадвае галоўны эканаміст РФПІ Дзмітрый Палявы.

Улетку ад абавязку пералічваць нафтадаляры ў РФ вызвалілі «Раснафту». Патрабаванне рэпатрыяваць валюту дзейнічала для кампаніі з 2014 года, але прынятыя Дзярждумай папраўкі скасавалі гэтую норму са спасылкай на тое, што «Раснафце» патрэбныя грошы для куплі імпартнага абсталявання і выплаты запазычанасці. У снежні баланс валютных плыняў у Расеі пагоршыцца, прагназуе аналітык «Райффайзенбанка» Дзяніс Парывай: да традыцыйнага піку выплаты замежнай запазычанасці (12,5 млрд даляраў) дадасца адток дывідэндаў для замежных трымальнікаў расейскіх акцый яшчэ на 5,4 млрд.

У 2019 годзе сітуацыя можа пагоршыцца яшчэ мацней: чысты прыток валюты (сальда існага рахунку) складзе толькі 33 млрд даляраў, чаго не выстарчыць нават для выплат заходніх пазык (54 млрд даляраў), не кажучы ўжо пра тое, каб кампенсаваць дадатковы адток капіталу ў выпадку санкцый, адзначае Парывай.

Калі ў такіх варунках ЦБ адновіць скупку валюты, адбіраючы з рынку па некалькі мільярдаў даляраў на месяц, гэта прывядзе «да істотнага паслаблення рубля ад існых узроўняў», прадаўжае экспэрт: курс даляра можа падскочыць на 10 рублёў - да 73-77 рублёў.