Інтэрнэт абложанай крэпасці

Але мур усё адно будзе разбураны. Усё, што абмяжоўвае, душыць чалавека – нежыццяздольнае.

Няўрымслівы сенатар Клішас і палоніевы дэпутат Лугавы ўнеслі ў Дзярждуму чарговы законапраект, які абмяжоўвае свабоду ў РФ. На гэты раз – у сеціве. Неабходнасць закона аб "забеспячэнні аўтаномнай працы расейскага сегменту інтэрнэту пры адключэнні ад глабальнай інфраструктуры" яны тлумачаць, зразумелая справа, "агрэсіўным характарам прынятай у верасні 2018 года стратэгіі нацыянальнай кібербяспекі ЗША", якія "бяздоказна" вінавацяць нас, белых і пухнатых, у прыгожынскіх хакерскіх атаках, піша Тэлеграм-канал "СерпомПо".

Фактычна гаворка ідзе пра стварэнне ўласнага інтэрнэту "абложанай крэпасці", якая (і гэта галоўнае) у аблозе толькі ў запаленых мазгах Пуціна і ягоных чыноўнікаў. Расею зноў хочуць агарадзіць ад усяго свету мурам, на гэты раз віртуальным XXI стагоддзя. Хай і з вялікай колькасцю шчылінаў, але тым не менш.

Прыехалі, як той казаў. Налета будзе адзначацца 30-годдзе падзення галоўнага на той момант муру – Берлінскага. Падзеі, якія адзначылі канчатковы канец халоднай вайны. Расея, не кажучы ўжо пра іншыя краіны Усходняй і Цэнтральнай Еўропы, заплаціла за сваю свабоду нашмат большы кошт.

І вось цяпер зноў спускае гэтую свабоду ў каналізацыю ўласнай гісторыі. І вяртаецца ў ізаляцыю, у тупік, да будаўніцтва новай IT–"жалезнай" заслоны. "Як аб сцену..."

Выходзіць з гэтага тупіка зноў давядзецца доўга і пакутліва, з стратамі. І добра б не такімі самымі або яшчэ больш дарагім коштам (чарговым распадам уласнай краіны).

У выніку мур усё адно будзе разбураны. Усё, што абмяжоўвае, душыць чалавека – нежыццяздольнае.