СБУ: Расейская «фабрыка троляў» спрабуе купіць доступ да старонкі ўкраінцаў у Facebook і Twitter

Старонкі ўкраінцаў у сацыяльныя сеткі спецслужбы РФ маюць намер выкарыстоўваць для ўмяшання ва ўкраінскія выбары.

Прадстаўнікі расейскай фірмы «Агенцтва інтэрнэт-даследаванняў», вядомай як «фабрыка троляў», спрабуюць купіць ва ўкраінскіх карыстальнікаў доступ да старонак у Facebook і Twitter. Пра гэта 14 снежня паінфармавалі ў Службе бяспекі Украіны.

«Супрацоўнікі Службы бяспекі Украіны зафіксавалі масавыя спробы выкарыстання спецслужбамі РФ адкрытага інструмента сацыяльных сетак Facebook і Twitter з мэтай далейшага ўмяшання ў выбарчыя працэсы ва Украіне», - гаворыцца ў паведамленні.

Паводле звестак украінскай спецслужбы, расейцы за грашовае ўзнагароджанне просяць пра часовы доступ да так званага рэкламнага кабінета старонак для нібыта «распаўсюду праз іх таргетынгавай рэкламы і прасоўвання камерцыйных інтарэсаў».

«На самой справе атрыманыя прадстаўнікамі краіны-агрэсара правы доступу да старонак украінцаў у сацыяльных сетках будуць выкарыстаны спецслужбамі РФ для правядзення разведвальна-падрыўной дзейнасці, маніпулявання грамадскай свядомасцю, умяшання ў перадвыбарчыя працэсы, а таксама распаўсюджвання антыўкраінскіх матэрыялаў, накіраваных на дэстабілізацыю грамадска-палітычнай абстаноўкі ў дзяржаве», - падкрэслілі ў СБУ.

Карыстальнікаў сацыяльных сетак спецслужба Украіны заклікала быць уважлівымі і паведамляць на гарачую лінію СБУ аб такіх прапановах або фактах размяшчэння антыўкраінскіх публікацый у інтэрнэце.

31 сакавіка 2019 года ва Украіне павінны адбыцца прэзідэнцкія выбары, 27 кастрычніка 2018 года - выбары ў Вярхоўную Раду.

У кастрычніку прэзідэнт Украіны Пятро Парашэнка сказаў, што Расея збіраецца актыўна ўмешвацца ў выбарчую кампанію ва Украіне, аднак заходнія партнёры будуць дапамагаць Украіне змагацца з магчымымі кібератакамі.

22 лістапада Вярхоўная Рада павялічыла фінансаванне Цэнтральнай выбарчай камісіі Украіны з мэтай абароны інфармацыйных рэсурсаў.