У Менску ўручаць антыпрэмію для чыноўнікаў
7- 14.12.2018, 18:12
- 14,705
Актывісты высмеялі горшых менскіх чыноўнікаў.
«Мы выступаем за цывілізаваны дыялог, а не за брэх з-за кута», - пішуць арганізатары.
У Менску ўручаць антыпрэмію для чыноўнікаў, інфармуе «Еўрарадыё» са спасылкай на greenbelarus.info. Яе заснавалі арганізатары кінафестывалю WATCH DOCS Belarus і ініцыятыва «Горад для гараджан». Яны хацелі «акрэсліць правы чалавека і межы ў публічнай прасторы», высмеяць горшых менскіх чыноўнікаў. «Мы выступаем за цывілізаваны дыялог, а не за брэх з-за кута, - пішуць арганізатары. - Таму прадстаўнікоў ведамстваў, адзначаных у нашым спісе, мы запросім на ўручэнне нашага медалю падчас закрыцця фестывалю».
На антыпрэмію прэтэндуюць дзевяць намінантаў:
Менгарвыканкам - за планы высечы амаль 5 гектараў лесу ў Бараўлянскім сельсавеце;
Спецкамбінат КБА - за «добраўпарадкаванне» Вайсковых могілак;
«Менская спадчына» - за рэканструкцыю Камсамольскай вуліцы;
Беларуская Праваслаўная Царква - за бульдозерную «рэканструкцыю» будынка ў Ракаўскім прадмесці;
Адміністрацыя Першамайскага раёна Менска - за пагарду чыноўнікаў да працэдуры грамадскага абмеркавання і меркавання людзей;
«Зеленбуд» - за знішчэнне знакамітай вярбы каля парку Горкага і сотняў іншых дрэў па ўсёй сталіцы;
Міністэрства працы і сацыяльнай абароны - за тое, што ўважаюць некаторых грамадзян дармаедамі.
Следчы камітэт - за «справу БелТА».
Камітэт архітэктуры і горадабудаўніцтва Менгарвыканкама - за знос сімвала Грушаўкі, кінатэатра «Авангард».
Паводле галасавання, лідзіруе Менгарвыканкам. Уручэнне антыпрэмій запланаванае на 16 снежня.