Пакуль Леанід Кулакоў ляжаў у лякарні, яго завочна аштрафавалі за пікет каля КДБ
14- 13.12.2018, 20:01
- 13,202
Актывіста «Еўрапейскай Беларусі» аштрафавалі на 980 рублёў.
Леаніда Кулакова аштрафавалі на 980 рублёў за ўдзел у акцыі памяці рэпрэсаваных літаратараў 29 кастрычніка каля менскага КДБ.
«Сёння па пошце я атрымаў ліст з Цэнтральнага суду. Паведамляюць, што мяне судзілі 11 снежня і што я нібыта пра суд быў «належным чынам паінфармаваны». Але я ў той дзень яшчэ ляжаў у 11-м менскім шпіталі, усе залечваў зламаную каля Курапатаў руку. Адкуль я мог ведаць пра суд?» - сказаў «Радыё Свабода» Леанід Кулакоў.
Са слоў актывіста, у пратаколе запісана, што ён «стаяў са свечкай і выкрыкваў «Жыве Беларусь!».
Прысуд за ўдзел у масавай акцыі (ч. 3, арт. 23:35 КоАП) яму завочна вынес суддзя Валерый Ёсьман.
За ўдзел у гэтай акцыі па тым жа сцэнары аштрафавалі Вольгу Нікалайчык і Максіма Вінярскага - таксама на 980 рублёў, таксама завочна і ў тым жа судзе.