Відавочца распавёў пра выбух у Назрані

У аўто закінулі гранату, у выніку чаго загінулі двое расейскіх сілавікоў.

Выбух у Назрані вечарам 12 снежня адбыўся ля гандлёвага цэнтра «Каўчэг». Уладальнік ГЦ Ідрыс Абадзіеў паведаміў РБК, што інцыдэнт адбыўся ў суседнім з гандлёвым цэнтрам будынку.

З ягоных слоў, на месцы падзей таксама была чутная страляніна. «У падвальным памяшканні спачатку быў стрэл, потым выбухнула граната, потым зноў быў стрэл. Праз невялікі прамежак часу вонкі выбеглі параненыя супрацоўнікі праваахоўных органаў. У іх асколачныя раненні, іх адразу шпіталізавалі. Усю тэрыторыю ачапілі», - распавёў Абадзіеў.

З ягоных слоў, у выніку таго, што адбылося, ёсць загінулыя. «Там на ахове сядзеў адзін малады чалавек, а цяпер ён знік, на тэлефон не адказвае, у нас ёсць падазрэнні, што гэта ён [загінуў]», - распавёў уладальнік ГЦ.

Крыніца агенцтва «Интерфакс» сцвярджае, што ў ГЦ «Каўчэг» адбыўся выбух легкавога аўтамабіля. У аўто закінулі гранату, у выніку чаго загінулі двое сілавікоў. У той жа час агенцтва ТАСС са слоў крыніцы сярод медыкаў сцвярджае, што двое сілавікоў былі параненыя і дастаўлены ў бальніцу. «Два супрацоўнікі знаходзяцца ў РКБ у горадзе Назрані са шматлікімі раненнямі верхніх і ніжніх канечнасцяў. Яны ў свядомасці, стан сярэдняй цяжкасці, некрытычны. З імі працуюць нейрахірургі, траўматолагі», - заявіў суразмоўца агенцтва.