Актывы ў беларускіх банках, якія не абслугоўваюцца, дасягнулі рэкорднага ўзроўню

За месяц былі ўстаноўленыя адразу два рэкорды.

У кастрычніку гэтага года сума такіх актываў у банках РБ вырасла на рэкордную велічыню (32,7%) і дасягнула новага гістарычнага максімуму – 2,6248 млрд рублёў, піша select.by.

Такім чынам, за месяц былі ўстаноўленыя адразу два рэкорды. Зрэшты, гісторыя гэтага параметру кароткая: Нацыянальны банк пачаў яе публікаваць толькі з 1 траўня 2018 года, і тады ён быў роўны 1,7434 млрд рублёў. Але растуць актывы, якія не абслугоўваюцца, вельмі хутка. У абсалютным вылічэнні яны павялічыліся ў кастрычніку на 647,4 млн рублёў.

Відавочна, гэта звязана з нізкімі выдаткамі бюджэту, якія новы ўрад не спяшаецца павялічваць. У выніку фінансавае становішча шматлікіх прадпрыемстваў хутка пагаршаецца. Але можна чакаць, што у 2019 годзе яны атрымаюць падтрымку з бюджэту, сродкі ў якім ёсць, бо ён прафіцытны.

Рэкорднага ўзроўню ў кастрычніку дасягнула і доля актываў, якія не абслугоўваюцца, камерцыйных банкаў (без уліку Банка развіцця) у актывах, схільных да крэдытнай рызыкі: 4,9%. У верасні яна складала 4,1%, а паводле звестак за красавік - 3,5%.

Самі актывы, схільныя да крэдытнай рызыкі, таксама хутка растуць. Так, у кастрычніку яны павялічыліся ў параўнанні з вераснем на 315,6 млн рублёў і дасягнулі 53 103,2 млн рублёў.

Расце і чысты прыбытак банкаў. У кастрычніку ён склаў 91,7 млн рублёў, што істотна вышэй, чым у кастрычніку мінулага года. А за дзесяць месяцаў гэтага года чысты прыбытак дасягнуў 901,1 млн рублёў супраць 727,7 млн рублёў за аналагічны перыяд мінулага года.

У выніку рэнтабельнасць нарматыўнага капіталу камерцыйных банкаў павялічылася да 8,9% з 7,9% у папярэднім годзе. А рэнтабельнасць актываў склала 1,3% супраць 1,1% за студзень-кастрычнік 2017 года.

Пры гэтым нарматыўны капітал камерцыйных банкаў у кастрычніку павялічыўся на 81,2 млн рублёў у параўнанні з вераснем, гэта значыць, на 0,8%, і дасягнуў 10 500,5 млн рублёў. Статутны фонд у кастрычніку не змяніўся, склаўшы 5 266,7 млн рублёў.

Капітал павялічваецца не так хутка, як актывы банкаў, таму дастатковасць нарматыўнага капіталу ў банкаўскай сістэме РБ у кастрычніку знізілася да 18% з 18,2% у верасні. Год таму гэты параметр складаў 19,1%, г.з., памяншэнне гэтага нарматыву ў гадавым вылічэнні даволі істотнае.