Кіраўніца МЗС Аўстрыі скасавала візіт у Расею праз шпіёнскі скандал
5- 9.11.2018, 12:06
- 11,682
У аўстрыйскі МЗС выкліканыя расейскія дыпламаты.
Міністарка замежных справаў Аўстрыі Карын Кнайсль скасавала запланаваны візіт у Расею пасля таго, як стала вядома пра аўстрыйскага афіцэра, які працаваў на расейскую выведку.
Пра гэта заявіў аўстрыйскі канцлер Себасцьян Курц, паведамляе Krone Zeitung.
"Любы шпіянаж непрымальны, у тым ліку расейскі шпіянаж у Еўропе", – сказаў ён.
Канцлер таксама дадаў, што Вена "працуе з міжнароднымі партнёрамі" ў гэтым пытанні.
Паводле ягоных словаў, у аўстрыйскі МЗС былі выкліканыя расейскія дыпламаты.
Раней стала вядома, што ў Аўстрыі затрымалі экс-палкоўніка Узброеных сілаў краіны паводле падазрэння ў працы на расейскую выведку з канца 1990 гадоў.
Расследаванне вядзецца ў дачыненні да 70-гадовага аўстрыйскага палкоўніка ў адстаўцы, які перадаваў расейскай вайсковай выведцы інфармацыю пра міграцыйны крызіс, аўстрыйскую вайсковую авіяцыю і артылерыйскія сістэмы, а таксама дэталёвую інфармацыю пра шматлікіх аўстрыйскіх высокапастаўленых вайскоўцаў.
Паводле звестак выдання, за свае паслугі палкоўнік з Зальцбурга атрымаў блізу 300 тысячаў еўраў.
Кіраўніца МЗС Аўстрыі Карын Кнайсль у жніўні запрасіла прэзідэнта РФ Уладзіміра Пуціна на сваё вяселле.
Гэтая пастанова выклікала вострую крытыку з боку аўстрыйскіх СМІ і палітыкаў, якія запатрабавалі адстаўкі дыпламата.
Сама Кнайсль заявіла, што не шкадуе пра запрашэнне Пуціна.