Расея папрасіла ў Кітая выратавання ад нафтавых санкцый ЗША

У расейскіх кампаній цяпер няма сучасных тэхналогій і абсталявання.

У варунках санкцый Захаду, якія адразаюць Расею ад сучасных тэхналогій здабычы нафты і газу, урад РФ звярнуўся па дапамогу да Кітаю, піша finanz.ru.

На міжурадавых перамовах з КНР абмяркоўвалася магчымасць прыцягнення кітайскіх інвестараў на расейскі шэльф, распавёў кіраўнік Мінэнэрга Аляксандр Новак.

З ягоных слоў, кітайцаў папрасілі аб удзеле ў праектах «Газпром нафты» ў Баранцавым моры і на шэльфе Пячорскага мора, а таксама «шэрагу іншых радовішчаў».

«Прэм'ер дзяржсавета КНР Лі Кэцян казаў пра жаданне і цікавасць кітайскіх кампаній ва ўдзеле ў распрацоўках нафты і газу ў нашай краіне», - падкрэсліў Новак.

«У гэтым кірунку цяпер будуць дадзеныя адпаведныя даручэнні больш дэталёва прапрацаваць удзел кітайскіх партнёраў», - дадаў міністр (цытаты па ТАСС).

Пастаўкі ў РФ абсталявання для здабычы на шэльфе і сланцавай здабычы патрапілі пад забарону праз санкцыі, уведзеныя ў 2014 годзе, а летась - узмоцненыя. У выніку, паводле звестак Мінпрыроды, за 2016-17 гады ў краіне не было ўведзена ў эксплуатацыю ніводнага новага радовішча газу, не здолелі адкрыць ніводнага буйнога радовішча нафты, а працы на арктычным шэльфе давялося прыпыніць.

Пад ударам санкцый выявілася, дарэчы, Кірынскае газа-кандэнсатнае радовішча на шэльфе Ахоцкага мора, якое разглядалася ў якасці рэсурснай базы для трэцяй лініі завода ў вытворчасці СПГ на Сахаліне: пасля яго ўключэння ў санкцыйны спіс ЗША «Газпрому» давялося перанесці тэрміны пачатку работ з 2021 на 2023 год.

Праз санкцыі доўгі час былі замарожаныя працы на Паўднёва-Тамбейскім радовішчы ў ЯНАА, якое распрацоўвае «Новатэк» і якое павінна было пастаўляць сыравіну для праекта «Ямал-СПГ».

На тыя ж прычыны давялося адкласці запуск СПГ-тэрмінала «Газпрома» ў Калініградскай вобласці, знізілася здабыча газу «Лукойла» і зменшыліся аб'ёмы вытворчасці кансорцыума «Эксан Нафтагаз Лтд», які працуе на праекце «Сахалін-1», пералічвае Мінпрыроды ў дакладзе «Аб стане і выкарыстанні мінеральна-сыравінных рэсурсаў РФ».

«Раснафта» заявіла пра магчымую затрымку запуску радовішча «Рускае» і іншых праектаў. «Гэта звязанае з выкананнем абавязацельстваў у абмежаванні здабычы нафты ў адпаведнасці з дамовай АПЕК +, а таксама санкцыямі супраць расейскіх нафтавых кампаній», - гаворыцца ў дакуменце.

«Раснафта» прыпыніла праекты на арктычным шэльфе, у тым ліку на Паўднёва-Прыновазямельскім, Паморскім, Паўночна-Паморскім-1, Паўночна-Паморскім-2, Рускім, Заходне-Матвееўскім і Усходне-Сібірскім ліцэнзійных участках.

Хоць Расея змагла нарасціць здабычу да 11,4 млн барэляў за дзень, пабіўшы савецкі 1987 год, нібыта зусім нізкі існы эфект санкцый не павінен уводзіць у зман: тэхналагічныя абмежаванні дзейнічаюць паводле прынцыпу складанага адсотка, адзначае дырэктар энэргетычнай школы «Сколкава» Таццяна Мітрова.

«Найбольш дакладны вобраз тут – праславутае «кольца анаконды», якое выкарыстоўвалася яшчэ супраць Савецкага Саюза, - кажа Мітрова. - У расейскіх кампаній цяпер практычна няма сваіх тэхналогій і абсталявання для асваення нетрадыцыйных і марскіх запасаў».

Згодна з яе прагнозам, да 2025-га года праз санкцыі Расея страціць блізу 5%, ад існай здабычы нафты, а да 2030-га - блізу 10%, або за 1,1 млн барэляў на дзень. У грашовым вылічэнні пры існых нафтавых каціроўках гэта 28,5 млрд даляраў экспартнага прыбытку штогод.