«Беларусбанк» падняў стаўкі па крэдытах на жыллё і спыніў выдачу новых

Чыноўнікі не тлумачаць прычыны прыняцця такіх пастаноў.

«Беларусбанк» не будзе выдаваць новыя крэдыты на жыллё да канца года. Ад 8 лістапада стаўка па крэдытах на жыллё вырасце з 13% гадавых да 15%. Пры гэтым Банкаўскі кодэкс з канца кастрычніка забараняе аднабакова прыняцце пагаршэння адсоткавых ставак па крэдытах і ўкладах насельніцтва, паведамляе «Радыё Свабода».

Паводле інфармацыі на сайце «Беларусбанка», прыём новых заяваў грамадзян на крэдыт на набыццё жылых памяшканняў прыпынены да 31 снежня 2018 года ўключна. Што будзе пасля 31 снежня і ці будзе адноўлены прыём заявак - не ўдакладняецца.

Стаўкі па крэдытах на набыццё жылых памяшканняў павышаюцца з 13% да 15% гадавых - да стаўкі рэфінансавання цяпер дадаецца не тры адсоткі, а пяць.

Прычыны такіх пастаноў не паведамляюцца, іх адпаведнасць нядаўнім зменам у Банкаўскі кодэкс (які забараняе аднабакова прымаць пагаршэнне адсоткавых ставак па крэдытах і ўкладах насельніцтва) не апісваецца.

«Беларусбанк» - найбуйнейшы ўладальнік крэдытаў у краіне як для фізічных, так і для юрыдычных асоб. Паводле даследавання рэйтынгавага агенцтва БДУ, на «Беларусбанк» прыпадае на 1 студзеня 2018 года 41,41% крэдытаў юрыдычным асобам, 63,11% крэдытаў фізічным асобам, а таксама 29,7% крэдытаў на фінансаванне нерухомасці.

Пры гэтым доля крэдытаў фізічным асобам у «Беларусбанку» знізілася за 2017 год на цэлых 10 адсоткаў (прыкметна выраслі долі «БПС-Ашчадбанка», «Белгазпрамбанка» і «Белінвестбанка»).