СМІ: Патанулы док «Адмірала Кузняцова» трэснуў
24- 7.11.2018, 8:27
- 27,862
Расейцы не могуць падняць яго з дна мора.
Вадалазы агледзелі патанулы ў акваторыі 82-га суднарамонтнага завода ў Мурманску плывучы док ПД-50 з авіяносцам «Адмірал Кузняцоў». Пра гэта паведаміла 6 лістапада агенцтва "Интерфакс" са спасылкай на інфармаваную крыніцу.
Суразмоўца агенцтва распавёў, што вадалазы пры абследаванні выявілі расколіны, якія ўтварыліся ў выніку ўдару ПД-50 аб дно. Ён адзначыў, што ўлічваючы масу плывучага доку і яго ўзрост, пашкоджанні не дзіўныя.
Са слоў крыніцы, менавіта таму дагэтуль не прынятая пастанова аб тым, што далей рабіць з патанулым докам.
Плывучы док ПД-50, у які ставілі авіяносец «Адмірал Кузняцоў», затануў 29 кастрычніка на суднарамонтным заводзе ў пасёлку Раслякова Мурманскай вобласці РФ. Пацярпеў і сам авіяносец.
Прадстаўнік цэнтра суднарамонту «Звездочка» Яўген Гладышаў заявіў, што плывучы док затануў праз скачок напружання ў электрасетцы.
Следчы камітэт РФ распачаў крымінальную справу паводле факта парушэння правілаў бяспекі пры арганізацыі работы ў рамонце.
Док ПД-50 быў пабудаваны ў Швецыі на замову СССР у 1980 годзе. Яго грузападымальнасць - 80 тысяч тон. Прызначаны для рамонту буйных надводных караблёў і падводных лодак.
«Адмірал Кузняцоў» - адзіны авіяносец у складзе ВМФ Расеі і апошні ўведзены ў эксплуатацыю ў СССР. Яго будаўніцтва пачыналася ў пачатку 80-х на базе тыпавога праекта 1145.