«Раснафта» хоча ўвесці штрафы за пратэрміноўку плацяжоў праз санкцыі ЗША

Кампанія занепакоеная маючым адбыцца пашырэннем санкцыйных захадаў.

Кампанія «Раснафта» хоча, каб яе заходнія пакупнікі прынялі новыя ўмовы і з 2019 года пачалі выплачваць штрафы ў выпадку нявыплаты за пастаўкі праз новыя амерыканскія санкцыі ў дачыненні да расейскага энэргетычнага сектара, паведамляе агенцтва Reuters са спасылкай на трэйдараў і чарнавыя кантракты «Раснафты».

Са слоў крыніц, пакупнікі, сярод якіх найбуйнейшыя нафтавыя кампаніі свету, такія як BP, Royal Dutch Shell, Total, Vitol і Gunvor, выступаюць рашуча супраць такой меры, паведамляе «Голос Америки».

Супрацьстаянне, хутчэй за ўсё, вымусіць «Раснафта» змякчыць патрабаванні. Сітуацыя ўказвае, наколькі кампанія занепакоеная пашырэннем амерыканскіх санкцый.

«Праз санкцыі сітуацыя вельмі нявызначаная, і «Раснафта», відавочна, занепакоеная і спрабуе мінімізаваць магчымыя рызыкі, - адзначае крыніца ў буйной еўрапейскай кампаніі. - Мы сказалі: «не», мы не можам прыняць такія ўмовы».

Прадстаўнікі «Раснафты» пакуль не даюць каментароў. BP і Gunvor адмовіліся даць каментары, Shell, Total і Vitol не адказалі на запыт Reuters.

Расея знаходзіцца пад дзеяннем санкцый з боку ЕЗ і ЗША з 2014 года, калі быў анэксаваным Крым. Санкцыі неаднаразова пашыраліся, ахопліваючы ўсё больш кампаній і сектараў, што ўскладняе для расейскіх нафтавых кампаній атрыманне крэдытаў за мяжой, прыцягненне новых капіталаў і засваенне арктычных і нетрадыцыйных запасаў нафты.

Адміністрацыя прэзідэнта РФ Уладзіміра Пуціна разлічвала на пацяпленне ў стасунках з ЗША пасля інаўгурацыі прэзідэнта Дональда Трампа, аднак замест гэтага Вашынгтон увёў новыя санкцыі, якія закранулі шэраг найбагацейшых расейцаў.

Расейскія кампаніі рыхтуюцца да новай хвалі санкцый, якая можа пачацца найбліжэйшым часам. Кампаніі імкнуцца праводзіць дыверсіфікацыю, сыходзячы ад даляравых транзакцый і звяртаючыся да Азіі для задавальнення сваіх фінансавых і тэхналагічных патрэб.

Кампаніяй «Раснафта» кіруе блізкі паплечнік Пуціна, Ігар Сечын. З 2014 года і ён сам, і яго кампанія падвяргаліся санкцыям. Пакуль «Раснафта» не ўваходзіць у спіс асоб асаблівых катэгорый і забароненых асоб, што не дазволіла б ёй супрацоўнічаць з буйнымі заходнімі кампаніямі.

Калі раней сёлета Вашынгтон уключыў у спіс кампанію «Русал», гэта істотна адбілася на аб'ёмах яе экспарту і абмежавала доступ да сыравіны ад пастаўшчыкоў з усяго свету.