«Хацеў самасцвярджацца»: У Берасці старшына атрымаў чатыры гады за дзедаўшчыну
15- 6.11.2018, 17:37
- 17,360
Ён збіў пецярых жаўнераў тэрміновай службы.
5 лістапада ў судзе Маскоўскага раёна Берасця абвясцілі прысуд паводле абвінавачвання старшыны выведвальнага ўзвода ў гвалце над жаўнерамі тэрміновай службы, паведамілі tut.by ў прэс-службе Берасцейскага абласнога суда.
Абвінавачаны праходзіў службу на пасадзе камандзіра выведвальнага аддзялення выведвальнага ўзвода вайсковай часткі ў воінскім званні старшына. Як устаноўлена судом, ён, жадаючы самасцвярджацца ў вайсковым калектыве і паказаць сваю перавагу, збіў пецярых жаўнераў тэрміновай службы. З высноў экспэртаў, іх цялесныя пашкоджанні не пацягнулі за сабой кароткачасовага разладу здароўя.
Суд прызнаў вайскоўца вінаватым у перавышэнні службовых паўнамоцтваў, звязаным з гвалтам, і прызначыў яму пакаранне ў выглядзе 4 гадоў пазбаўлення волі ў калоніі ўзмоцненага рэжыму без канфіскацыі маёмасці. Мужчыну пазбавілі воінскага звання і забаранілі на пяць гадоў займаць пасады, звязаныя з выкананнем арганізацыйна-распарадчых абавязкаў ва Узброеных сілах і воінскіх фармаваннях.
Прысуд не ўвайшоў у законнае дзеянне і можа быць абскарджаны і апратэставаны ў апеляцыйным парадку.