Еўракамісія не пойдзе з Італіяй на ўгоду па дзяржаўнаму бюджэту

Да 13 лістапада італьянскія ўлады павінны даць абноўлены варыянт бюджэту на 2019 г.

Еўракамісія запатрабавала ад Італіі прэзентаваць праект бюджэту на 2019 г., які адпавядае нормам ЕЗ. Пра гэта ў панядзелак, 5 лістапада, заявіў камісар Еўразвязу ў эканоміцы П'ер Маскавісі на сустрэчы з міністрамі фінансаў краін еўразоны, паведамляе DW.

«Памылкова» меркаваць, што Брусэль пойдзе з Рымам на «свайго роду ўгоду», каб урэгуляваць гэты канфлікт, падкрэсліў еўракамісар.

«Не, гэта не абмяркоўваецца, мы не вядзём перамовы. Правілы ёсць правілы, іх неабходна паважаць», - дадаў Маскавісі.

У Рыма ёсць час да 13 лістапада

У канцы кастрычніка Еўрапейская камісія адхіліла праект бюджэту Італіі на наступны год. Рым запланаваў дэфіцыт сумаю 2,4 працэнты ад ВУП. Толькі такім чынам урадавая кааліцыя з правых радыкалаў і папулістаў, на ўласнае прызнанне, зможа прафінансаваць выкананне перадвыбарных абяцанняў. Аднак, згодна з нормамі ЕЗ, дэфіцыт не павінен перавышаць 2 працэнтаў ад ВУП краіны.

Цяпер да 13 лістапада італьянскія ўлады на патрабаванне Брусэля павінны падаць абноўлены варыянт каштарысу. У адваротным выпадку еўрапейская супольнасць запусціць у дачыненні да Рыма працэдуры, звязаныя з залішнім дэфіцытам, што пагражае высокімі штрафамі.

Кіраўніцтва ЕЗ уважае, што палітыка новага ўрада Італіі, які вырашыў адмовіцца ад ранейшага курсу эканоміі фінансавых сродкаў і кансалідацыі бюджэту, пагражае фінансавай стабільнасці ў еўразоне і ва ўсім Еўрапейскім Звязе. Крытыкі італьянскага ўрада нагадваюць, што дзяржаўная запазычанасць Італіі ўжо складае 2,3 трыльёна еўра або 130 працэнтаў ад ВУП краіны. Гэта другі па велічыні пазыковы паказчык у еўразоне пасля Грэцыі.