15-метровы факел агню: у РФ прарвала магістральны газаправод

Прарыў магістральнага газаправода адбыўся ў Пуцяцінскім раёне Разанскай вобласці.

У Пуцяцінскім раёне Разанскай вобласці, непадалёк ад вёскі Унгар, адбыўся прарыў магістральнага газаправода, гаворыцца ў паведамленні рэгіянальнага ўпраўлення МНС РФ.

«Пацярпелых няма. На месца здарэння выехалі 10 адзінак тэхнікі, 24 чалавекі асабовага складу», - гаворыцца ў паведамленні ведамства. Паводле звестак «РИА Новости», на месцы прарыву утварыўся факел полымя вышынёй 15 м. Цяпер участак газаправода працягласцю амаль 50 км перакрыты, адбываецца выгаранне газу. «Ліквідацыю пажару правядуць шляхам перакрыцця засавак, затым спецыяльныя службы пачнуць рамонт на месцы парыву», - распавялі ТАСС у прэс-службе МНС РФ.

Як удакладняе мясцовы партал rzn.info, са слоў відавочцаў, разрыў двух галінак газаправода адбыўся каля вёскі Ясноўка. У раёне здарэння загарэўся лес. Зарыва ад пажару відаць у некалькіх суседніх раёнах вобласці. Фатаграфіі з месца пажару ў сацсетцы «Вконтакте» апублікавала выданне 62ИНФО.

24 кастрычніка ва Уладзімірскай вобласці, каля пасёлка Адына, адбылося загаранне магістральнага газаправода. Ад агню пацярпела да 3 га лесу.