У Егіпце разбіўся створаны ў РФ знішчальнік МіГ-29М

Пастаўкі расейскіх самалётаў з гэтай партыі ў Егіпет пачаліся ў красавіку.

У Егіпце пры выкананні трэніровачнага палёту разбіўся знішчальнік МіГ-29М расейскай вытворчасці, паведамляе «РИА Новости» са спасылкай на прэс-службу ААК. Егіпецкія ВПС атрымалі яго ў 2018 годзе.

«Мы маем аператыўную інфармацыю аб аварыі МіГ-29М ВПС Егіпта. Найбліжэйшым часам нашы тэхнічныя спецыялісты адправяцца ў Егіпет для дапамогі ў расследаванні здарэння», - паведамілі ў карпарацыі.

Раней пра катастрофу са спасылкай на крыніцы паведамляў «Коммерсантъ». Суразмоўца выдання ўдакладніў, што прычынай інцыдэнту маглі стаць альбо тэхнічныя непаладкі (адмова сістэмы кіравання), або памылка пілота. Сам лётчык паспеў катапультавацца перад катастрофай. Расследаванне здарэння будзе весці спецыяльная камісія ВПС Егіпта.

Пакет кантрактаў у вайскова-тэхнічнай сферы на суму прыкладна $3,5 млрд Масква і Каір падпісалі яшчэ ў 2014 годзе. У рамках кантракта ў Егіпет павінны весціся пастаўкі расейскіх сістэм супрацьпаветранай абароны, артылерыі, стралковай зброі, а таксама авіяцыі. Першыя знішчальнікі МіГ-29М паступілі ў Егіпет у красавіку 2018 года. У адпаведнасці з планам, Каір павінен атрымаць 46 такіх машын.

МіГ-29М уяўляе сабой глыбокую мадэрнізацыю базавай мадэлі, МіГ-29, распрацоўка якой вялася ў 1970-х гадах. Першы палёт МіГ-29М здзейсніў у 1986 годзе. Машына адрозніваецца ўдасканаленай сістэмай кіравання, канструкцыяй паветразаборнікаў і тармазной сістэмы, пашыранай наменклатурай узбраення і належыць да пакалення 4++. МіГ-29М - аднамесны варыянт машыны, існуе таксама двухмесны варыянт МіГ-29М2.

У пачатку кастрычніка ў Маскоўскай вобласці разбіўся знішчальнік МіГ-29, які належаў Лётна-даследчаму інстытуту (ЛІІ) імя Громава. Абодва пілоты катапультаваліся. Самалёт упаў каля вёскі Астраўцы ў Раменскім раёне Падмаскоўя.