Беларускі аўтамеханік распавёў, чым аўто 90-х лепшыя за сучасныя

Беларус займаецца рамонтам аўтамабіляў ужо 14 гадоў

Аўтамеханік Юрый Хаменка, які займаецца рамонтам аўтамабіляў 14 гадоў, мяркуе, што машыны, выпушчаныя ў 90-х гадах мінулага стагоддзя, лепшыя за сучасныя, піша intex-press.by. Вось галоўныя, на погляд Юрыя, перавагі аўтамабіляў тых гадоў:

Дызайн

Большасць аўтамабіляў 90-х гадоў мелі простую канструкцыю. Бясспрэчна, цяпер аўто выглядаюць больш стыльна і прывабна, і гэта нядзіўна: вонкавы выгляд стаў рухавіком продажаў.

Разам з тым аўтамабілі страцілі сваю ўнікальнасць. Раней у кожнай мадэлі былі рысы, якія адрознівалі яе ад іншай. Сёння, гледзячы на сучасныя аўтамабілі на дарозе, часцяком здалёк немагчыма вызначыць мадэль, а часам нават і марку.

Кіраванне

У новых аўтамабілях кіраванне настолькі лёгкае, што стырно можна круціць адным пальцам. Вядома, у гэтым ёсць нейкая перавага. Але ў старых аўтамабілях, па-мойму, кіроўца вядзе сябе больш упэўнена, бо адчувае машыну нашмат лепш.

У аўтамабілях, выпушчаных у 90-я гады, стырнавое кіраванне было практычна наўпрост звязанае з коламі. Сучасныя патрабаванні бяспекі прадугледжваюць шмат прамежкавых прылад паміж кіроўцам і аўто: электрычныя ўзмацняльнікі стырна, сістэмы дапамогі пры тармажэнні, кантроль цягі, узмацняльнікі стырнавога кіравання, аўтаматычная паркоўка заднім ходам без удзелу кіроўцы. Усё гэта не дае аўтааматару адсуць сапраўднае паводзіны аўтамабіля.

Асабліва сумна, што цяпер з'явіліся кіроўцы, якія не ўяўляюць, як гэта - кіраваць машынай без розных сістэм бяспекі і дапамогі.

Матэрыялы

Нягледзячы на прыемны вонкавы выгляд, якасць матэрыялаў сучасных аўтамабіляў кардынальна пагоршылася. У інтэр'еры выкарыстоўваюць больш танныя аналагі пластыка. Матэрыялы экстэр'ера не толькі сталі таннейшымі, але і пагоршыліся праз патрабаванні нормаў бяспекі. Часцей сталі выкарыстоўвацца і аднаразовыя элементы.

Рамонт

І ў сучасных аўто, і ў аўтамабілях 90-х ёсць электронныя часткі, але колькасць іх розная. Павышэнне камфорту пацягнула за сабой кардынальнае ўскладненне электронных сістэм. З аднаго боку, у гэтым плюс сучасных машын. Напрыклад, можна правесці дыягностыку большай колькасці блокаў і большай колькасці параметраў, каб лепш разумець стан аўтамабіля.

Разам з тым, вызначыўшы паломку, уладальнікам новых аўтамабіляў трэба рыхтавацца да істотных выдаткаў. Раней, калі ў аўто пераставаў гарэць габарыт, трэба было зачысціць кантакт альбо памяняць лямпачку. Цяпер жа прычына можа палягаць у няспраўнасці электроннага блока, які каштуе істотную суму. Ды і агулам рамонт няспраўнасцяў у электронных частках каштуе нятанна. Пры гэтым большасць кіроўцаў самастойна адрамантаваць свой новы аўтамабіль не могуць: абслугоўванне «востраць» выключна пад паслугі сэрвіснага цэнтра.