У Румыніі знайшлі карціну Пікасо, выкрадзеную ў Ратэрдаме шэсць гадоў таму
- 18.11.2018, 20:30
- 9,657
Падчас рабавання з музея было выкрадзена сем карцін коштам на мільёны еўраў.
У Румыніі, магчыма, знайшлі карціну Пабла Пікасо "Tête d'Arlequin", выкрадзеную з музея ў Ратэрдаме ў 2012 годзе.
Пра гэта паведамляе eurointegration.com са спасылкай на Reuters.
Падчас рабавання з музея было выкрадзена сем карцін коштам на мільёны еўраў аўтарства Пікасо, Маціса, Манэ ды іншых.
У 2013 годзе выкрадальнікаў злавілі і асудзілі, але ніводную з выкрадзеных карцін не знайшлі. Экспэрты меркавалі, што прынамсі тры з іх былі спаленыя ў спробе знішчыць довады.
"Пракуроры расследуюць абставіны, пры якіх карціна, падпісаная Пікасо коштам блізу 800 тысяч еўраў была знойдзеная ў суботу ўвечары ў акрузе Тулча", - гаворыцца ў заяве пракуратуры Румыніі.
Паводле афіцыйных звестак, двое грамадзян Нідэрландаў прыбылі ў галандскую амбасаду ў Бухарэсце і заявілі пра знойдзеную карціну на паўднёвым усходзе краіны.