Рассельгаснагляд забараніў транзіт мяса птушкі з ЗША

РФ заблакавала транзіт амерыканскага мяса ў Казахстан.

Федэральная служба ветэрынарнага і фітасанітарнага нагляду (Рассельгаснагляд) абвясціла аб увядзенні часовых абмежаванняў на транзіт па тэрыторыі Расеі амерыканскага мяса птушкі, прызначанага для Казахстана. У прэс-службе ўстановы такую пастанову патлумачылі тым, што прадукцыя «невядомага паходжання» , якая патрапіла ў суседнюю краіну, «можа ў выніку патрапіць на расейскі рынак, паведамляе РБК.

У Рассельгаснаглядзе адзначылі, што ў Казахстане адсутнічае ўнутраная сістэма, якая адсочвае перамяшчэнне тавараў, падкантрольных ветэрынарнаму нагляду гэтай краіны. Акрамя гэтага, пастаўкі з ЗША ў Казахстан ажыццяўляюцца з ветэрынарным сертыфікатам, адрозным ад патрабаванняў Еўразійскага эканамічнага саюза.

У расейскай структуры падкрэслілі, што раней у спецыялістаў ужо ўзнікалі пытанні да амерыканскага мяса птушкі, якое транзітам ішло ў Казахстан. Частка прадукцыі паступіла на тэрыторыю ЕАЭС пратэрмінаванай, а ў мясе ад двух амерыканскіх прадпрыемстваў знайшлі рэшткі лекавых сродкаў - тэтрацыкліну і метабалітаў нітрафуранаў.

Мяса птушкі з ЗША падпадае пад дзеянне прадуктовага эмбарга, якое Расея ўвяла ў 2014 годзе ў адказ на амерыканскія санкцыі. Да гэтага года дзейнічала і іншае абмежаванне на ўвоз, звязанае з «птушыным грыпам». Аднак у лютым яно было скасаванае.

У кастрычніку гэтага года Саюз птушкагадоўцаў Казахстана паведаміў пра тое, што імпарт мяса птушкі з ЗША вырас да 140 тысяч тон. З гэтага аб'ёму 128 тысяч тон - кумпячкі, 12 тысяч тон - белае мяса, паказвала выданне «Хабар 24».

Як паказваў прэзідэнт Саюза птушкагадоўцаў Казахстана Руслан Шарыпаў, павелічэнне імпарту было адной з умоў уступлення краіны ў СГА. Пры гэтым ён назваў гэтыя квоты нявыгаднымі, бо яны ставяць у невыгадныя ўмовы мясцовых вытворцаў.