Самая буйная перамога Навальнага

Крэмль усё больш страчвае легітымнасць у Еўропе.

Для Масквы вердыкт Еўрапейскага суда ў правах чалавека становіцца нагодай паставіць пад пытанне ягоную легітымнасць. Расея апошнім часам усё больш дыстанцуецца ад Рады Еўропы, часткай якой з'яўляецца і ЕСПЧ, зазначаюць Юльян Ханс і Вольфганг Яніш у сваім артыкуле на сайце Sueddeutsche Zeitung.

"Гэта стала не першым поспехам для расейскага апазіцыйнага палітыка Аляксея Навальнага ў Страсбургу, аднак самай буйной ягонай перамогай, якую ён калі-небудзь атрымліваў над расейскай уладай", – гаворыцца ў артыкуле. Як паведамляецца далей, ЕСПЧ пастанавіў, што Расея абавязаная выплаціць пазоўніку 50 тыс. еўраў у якасці кампенсацыі маральнай шкоды, 1025 еўраў для пакрыцця матэрыяльнай шкоды, а таксама 12653 еўры кампенсацыі судовых выдаткаў.

«У Страсбургу ўпершыню было агучанае тое, што і так ведаў кожны, але ў судовай інстанцыі рэдка артыкулявалася з такой дакладнасцю. Увесьчасны прыгнёт з боку расейскіх уладаў папулярных крытыкаў рэжыму, паўторныя затрыманні паводле нікчэмных падставаў – за ўсім гэтым хаваецца намер "здушыць палітычны плюралізм"», – пішуць аўтары матэрыялу.

Вызначальнай для ЕСПЧ стала, з усяго відаць, "агульная канцэпцыя дзеянняў супраць Навальнага: у перыяд з 2012 да 2014 года яго затрымлівалі 7 разоў, не лічачы больш ранніх затрыманняў. І кожны раз, адзначаюць страсбургскія суддзі, расейскія ўлады дзейнічалі супраць апазіцыянера ўсё больш жорстка" .

Асабліва характэрным, на думку журналістаў, у вердыкце ЕСПЧ становіцца той факт, што суд задзейнічаў артыкул 18 Еўрапейскай канвенцыі ў правах чалавека, якая дазваляе паказваць на існаванне палітычных намераў, якія могуць стаяць за парушэннямі закона.

"Ясны пасыл з Страсбурга на адрас Крамля можа паскорыць небяспечны працэс, – гаворыцца далей. – Расея апошнім часам усё больш дыстанцуецца ад Рады Еўропы, часткай якой з'яўляецца ЕСПЧ. З сярэдзіны 2017 года Масква спыніла выплату сяброўскіх унёскаў, а гэта 33 млн еўраў штогод. Гэта было адказам Расеі на тое, што пасля анэксіі Крыма яе парламентарыі былі пазбаўленыя права голасу ў ПАРЭ".

Спроба з дапамогай рэформы вярнуць расейцаў "назад у лодку" правалілася, канстатуе SZ. Як адзначыў у размове з выданнем прэс-сакратар Рады Еўропы Даніэль Хёльтген, "мы зыходзім з таго, што расейская дэлегацыя не з'явіцца на пасяджэнні ПАСЕ ўжо ў студзені і прадоўжыць ігнараваць выплаты". У канцы чэрвеня 2019 года пройдуць выбары новага генеральнага сакратара арганізацыі. "Малаверагодна, што расейцы застануцца ў клубе, у выбарах кіраўніка якога яны не змогуць удзельнічаць", – зазначаюць аўтары.

Паводле словаў кіраўніка МЗС РФ Сяргея Лаўрова, з таго моманту, як расейская дэлегацыя не ўдзельнічае ў галасаванні, было абрана 24 з 47 суддзяў ЕСПЧ. У гутарцы з Euronews ён у сувязі з гэтым засумняваўся ў легітымнасці арганізацыі.

Як адзначаюць у канцы журналісты, тры гады таму прэзідэнт Пуцін выдаў указ, згодна з якім Канстытуцыйны суд РФ можа ігнараваць вердыкты ЕСПЧ, калі яны супярэчаць расейскай Канстытуцыі. "Першапачаткова гэтая пастанова мела хутчэй фінансавую, чым палітычную падаплёку. ЕСПЧ прысудзіў тады ўласнікам ЮКАСа кампенсацыю памерам $ 1,9 млрд еўраў".