Стала вядома пра яшчэ адзін выпадак самасуду ў Юравічах

Крымінальная гісторыя аграгарадка атрымала прадаўжэнне.

У ходзе расследавання страшнага злачынства ў Калінкавіцкім раёне пачалі ўсплываць новыя эпізоды разбойнага жыцця падазраваных, паведамляе gomel.today.

Як апавяла прадстаўніца СК Марыя Крываногава, следчым стала вядома яшчэ пра адно злачынства, учыненае двума з трох затрыманых паводле справы аб крывавым забойстве ў Юравічах. У сакавіку падазраваныя 1998 і 2001 гадоў нараджэння збілі тапарышчам свайго аднавяскоўца.

Нагадаем, у ноч на 4 лістапада ў Юравічах тры мясцовыя хлопцы, аднаму з якіх усяго 17 гадоў, жорстка збілі гаспадара аднаго з дамоў наўпрост у яго двары. У бойцы пацярпела жонка мясцовага жыхара, а сусед, які надумаў заступіцца за сям'ю, памёр ад збіцця.

Высветлілася, што гэтая кампанія ўжо даўно трымае ў страху аграгарадок. Крывавае забойства стала апошняй кропляй – невядомыя нават падпалілі дом, у якім жыў адзін з забойцаў. Следчы камітэт расследуе забойства і спрабуе разабрацца, як Юравічы апынуліся ў такой сітуацыі.