Каб не вылічылі: катэджы ў Драздах рэкламуюць амаль без фатаграфій

Насельнікі пасёлка пачалі «шыфравацца».

Усе катэджы ў Драздах, якія спрабуюць выставіць на продаж або здаць, жыва цікавяць грамадства. Кожныя год-два выяўляецца: сям'я нейкага экс-чыноўніка хоча зарабіць на элітнай нерухомасці або пазбавіцца ад яе, піша tut.by.

Нядаўна вось «Наша Нiва» знайшла на Realt.by дом, які спрабавала здаць сям'я экс-кіраўніка КДБ. Пасля публікацыі рэклама дома знікла з сайта. Журналісты выявілі: зніклі амаль усе прапановы драздоўскіх катэджаў, якія хоць неяк намякалі на асобу гаспадара. Засталіся толькі тыя, што будаваліся на продаж.

За катэдж у Драздах сям'я Сухарэнкі хацела 3,5 тысячы даляраў за месяц. Аб'ява знікла гэтаксама хутка, як раней знікалі аб'явы ад іншых уласнікаў, пра якіх напісалі СМІ –цягам пары гадзінаў. Троху даўжэй пратрымалася аб'ява пра здачу «старога» дома экс-кіраўніка Нацбанка, за які родныя чыноўніцы хацелі атрымліваць 6 тысячаў даляраў за месяц. Яе мянялі, рэдагавалі, але ў выніку знялі.

Некаторая частка чыноўнікаў, іх дзяцей і нават бізнэсмэны, пра чые прыбыткі ведае ўся краіна, не хочуць жыць у Драздах. Але вельмі баяцца агалоскі гэтай пастановы.

Надзелы ў Драздах вылучаліся ўказам прэзідэнта пэўнаму колу асобаў. Як зазначыў адзін з насельнікаў Драздоў у асабістай гутарцы, ад такога падарунку не прынята было адмаўляцца. Бралі, будаваліся. А што рабіць з элітнай нерухомасцю, у стварэнне якой укладзеныя грошы, але якая не патрэбная? Яна стаіць, патрабуе выдаткаў на рамонт і падтрыманне парадку. Зразумела, што калі не прадаць, то прынамсі здаць – лагічная пастанова.

Эвалюцыя рэкламы катэджаў у Драздах

Спачатку дамы экс-чыноўнікаў здаваліся і прадаваліся проста без указанні нумароў – толькі вуліца і фота звонку і ўнутры. Аднак вылічыць, што каму належыць, журналісты змаглі і праз фасады сядзібаў. Пасля першага ж артыкула з рэкламы зніклі фасады дамоў, засталіся толькі нейкія кавалкі платоў, «задніх» двароў і інтэр'еры. У гэтым плане нават дзіўна, што дом экс-кіраўніка КДБ выставілі цалкам. Мабыць, хтосьці недагледзеў.

Пільныя грамадзяне сталі разглядаць хатнія фатаграфіі ў гэтых інтэр'ерах, партрэты, граматы, медалі. Высветлілася, і гэтага дастаткова, каб здагадацца, хто ўладальнік. Пасля гэтага на ўсіх фотаздымках перад размяшчэннем рэкламнай аб'явы сталі замазваць усе «паказальныя» дэталі.

Цяпер ясна, што калі дом паказаны «цалкам», а такіх у Драздах і цяпер прадаецца i здаецца некалькі, ён наўрад ці належыць экс-чыноўніку. Напрыклад, цалкам паказаны дом, які будаваў для сваёй вялікай сям'і Руслан Салей.

Яго прапаноўвалі ў арэнду за 8000 даляраў, цяпер кошт зніжаны да 5000 за месяц.

Цалкам, паўторымся, паказаны дамы, якія першапачаткова будаваліся на продаж.

А вось так апошнім часам выглядае рэклама драздоўскіх катэджаў, уладальнікі якіх не хочуць ідэнтыфікацыі.

Нібыта ложак ёсць, кухня ёсць, камін у наяўнасці. Кошт – 3,7 тысячы даляраў за месяц. Толькі што за дом, які надзел?

«Некаторая частка такой нерухомасці ўвогуле адкрыта не рэкламуецца, – тлумачыла дырэктарка буйнога агенцтва, якое спецыялізуецца на дарагой нерухомасці. – Звесткі ёсць у нас, да нас звяртаюцца кліенты з пэўнымі запытамі. Гэта значыць рэалізаваць аб'ект можна і не паказваючы шырокаму колу асобаў».

Зрэшты, такі від продажу зніжае шанцы хуткай рэалізацыі. Бо набываюць часцей за ўсё замежнікі, а ім трэба пажыць у нашай краіне, каб даведацца пра існаванне нерэкламаваных аб'ектаў і агенцтваў, якія іх акумулююць.