«І галоўнае, на зіму»: беларусам ламаюць платы праз прыезд Лукашэнкі

Улады паставілі вяскоўцам ультыматум.

У вёсцы Шылавічы Слонімскага раёна жыхарам вуліцы Танкістаў работнікі сельсавета сказалі памяняць платы. Тыя, у якіх выгляд яшчэ прымальны, - пафарбаваць, паведамляе «Газета Слонимская».

Са слоў жыхароў аграгарадка, мясцовая ўлада мяркуе, што іхняй вуліцай можа ехаць Лукашэнка на Дзень пісьменства ў Слонім. Частка платоў ужо знішчаная, хоць жыхарам далі тэрмін на замену платоў - да траўня.

- Пралёты плота паламалі і павезлі, пакінуўшы абсалютна голыя пляцы! Цяпер па нашых дварах спакойна бегаюць сабакі, каты, каровы ды іншая жыўнасць. Бо так хутка памяняць плот не кожны можа, гэта задавальненне не з танных, - распавялі пра сваю праблему карэспандэнтам "ГС" жыхары вёскі.

Карэспандэнты праехаліся па доўгай вуліцы Танкістаў. Амаль у кожным двары дэмантаваныя пралёты: дзе адзін, дзе два, а дзесьці і больш. Вясковыя жыхары патлумачылі, што па іх вуліцы хадзілі работнікі сельсавета са спісамі і ўсіх папярэджвалі, што агароджы трэба будзе проста пафарбаваць. Многія абавязаліся гэта зрабіць.

- У мяне тут лецішча. Я часта сюды прыязджаю. Да мяне прыйшлі з сельсавета, і я падпісаўся, што плот пафарбую. Адно біла ў плоце ў мяне было зламанае, я сказаў, што яго замяню, - пачаў свой аповяд агароднік Леанід Жылінскі.

Са слоў мужчыны, праз пару дзён прыехала машына з людзьмі - прадстаўнікамі сельсавета і рабочымі, якія сталі ламаць старыя пралёты плота па ўсёй вуліцы.

- Прыгналі аўтамабіль, ламалі пралёты і закідвалі ў аўтамабіль. Сказалі, што паступіў загад зверху прыбраць стары плот. Дачка майго 90-гадовага суседа-інваліда хадзіла ў райвыканкам, дзе ёй адказалі, што агароджы жыхары павінны ўсталяваць самі, - растлумачыў Леанід Жылінскі.

Жанчына памяняць плот не адмовілася.

- Мы пагадзіліся ўсе памяняць, распісаліся, што згодны. Але мы растлумачылі, што адразу гэта зрабіць не так проста. Паабяцалі за зіму сабраць матэрыял, грошы, нешта прыдумаць. Нам далі час да траўня. А тут без папярэджання прыехалі і зламалі, - дадала дачка 90-гадовага жыхара вуліцы Танкістаў.

Жыхары паспадзяваліся, што агароджы зробяць за кошт сродкаў раённага бюджэту, але час прайшоў, а руху ніякага няма.

- Нам пакуль не да платоў. У снежні-студзені нам будуць праводзіць газ, што таксама каштуе немалых грошай. Людзі бяруць крэдыты, каб за газ разлічыцца, а тут яшчэ і платы раскідалі. І галоўнае, на зіму... Навошта было гэта рабіць цяпер? - задаюцца пытаннем жыхары вуліцы.

Слонімка Валянціна Іванаўна прыязджае ў Шылавічы ў бацькоўскі дом, які размешчаны на вуліцы Танкістаў. Яна таксама вельмі незадаволеная тым, што частку пралётаў каля дома без папярэджання раскідалі.

- Я тут агарод саджаю, летам як на лецішча прыязджаю. Падтрымліваю парадак у доме і ля яго. За плотам брат канаву абкошвае заўсёды. А тут прыехала - часткі плота няма, рэшткі ад яго валяюцца. Потым да мяне ў двор прыйшла працаўніца сельсавета і сказала, што трэба пафарбаваць плот, - пачала свой аповяд Валянціна Іванаўна.

Жанчына працаўніцы сельсавета адказала, што плот фарбаваць не будзе.

- Гэты плот увесь з пяску, ён у нас тут на дошках і самарэзах трымаецца, відаць жа, што ён увесь крышыцца. Яго намочыш - ён увесь разваліцца. Прыбралі гэтыя пралёты, па двары ў мяне цяпер ходзяць усе, каму не лянота. Хтосьці кветачак хоча нарваць. У мяне іх шмат расце, мне не шкада, хай ірвуць... Але сама па сабе сітуацыя непрыемная. А аднойчы, калі я засталася з начлегам, позна ўвечары ў дзверы пастукалі. Я неяк разгубілася і, нават не спытаўшы, хто там, адчыніла. Стаіць нецвярозая жанчына з сабакам... Мабыць, убачыла, што святло ў доме гарыць, надумала зайсці. Я брамку ж замыкаю, а карысці, калі паловы пралётаў у плоце няма... - распавяла жанчына.

Людзі разумеюць, што трэба прыбіраць каля дома, падтрымліваць парадак і чысціню, па магчымасці - замяніць платы, пафарбаваць і гэтак далей. Але калі ў людзей няма грошай, што рабіць?

Па каментар карэспандэнт «ГС» звярнулася да старшыні Дзеравянчыцкага сельсавета Сяргея Бязносіка.

- Людзі не даглядалі платы. Толькі лічаныя вяскоўцы гэта рабілі. Трэба было падтрымліваць іх у нармальным стане. Калі будавалі аграгарадок, паставілі ўсім аднатыпных плот за бюджэтныя сродкі. Людзі некаторыя цяпер кажуць: «Гэта не мой плот, я рабіць не буду». Нядаўна цэнтралізавана прыбралі ўвесь зламаны бетонны паркан. Рабіце свой. А тэрмін ніхто не касаваў - да вясны, да 1 траўня, плот - які людзі захочуць, хоць сетку, але павінны паставіць.

- А калі не паставяць? - Ёсць нормы архітэктуры і будаўніцтва - надзел павінен быць абгароджаны. За невыкананне прадугледжаная адказнасць. - А чаму такі спех?

- Чаму такая тэрміновасць, я вам не гатовы сказаць, - пракаментаваў сітуацыю Сяргей Бязносік.