У Горадні адкрылася «Адметнасць» - крама з нацыянальнай сімволікай

У продажы ёсць усё, што тычыцца беларускіх, патрыятычных, нацыянальных тэм.

«Я раней чуў шмат пытанняў - дзе можна купіць такое ў Горадні? Ну вось цяпер тут», - распавядае Сяргей Верамеенка, гаспадар крамы. Крама працуе з 12 лістапада па адрасе Кірава, 3. Тут можна набыць адзенне, сувеніры і рэчы для дома з беларускай сімволікай, паведамляе hrodna.life.

У продажы - усё, што тычыцца беларускіх, патрыятычных, нацыянальных тэм. Тавары бяруць на рэалізацыю ў рамеснікаў і прадпрыемстваў - фабрык мастацкіх вырабаў. «Стараемся рабіць невялікую нацэнку, каб гэта было даступна для людзей», - кажа сям'я Верамеенкі, Сяргей і Вольга.

Кошт залежыць ад сабекошту. Футболкі каштуюць ад 19 рублёў. Там, дзе вялікія выдаткі па друку, кошт - 23 і 25. Жаночае сукенка ад Слонімскай фабрыкі каштуе 50 рублёў, світшоты - 42 і 48. Бейсболкі з бавоўны - 13 рублёў. Кубкі каштуюць 8,50 і 11. Таксама ў продажы ёсць дзіцячае адзенне, цацкі, нашыўкі, сувеніры, стужкі, значкі, магніты, абрусы. Верамеенкі - самі рамеснікі, валяюць з воўны. Іх вырабы таксама будуць прадстаўлены ў краме. З часам завязуць БЧБ-сцяжкі - сувенірныя і вялікія.

Крама разлічаная на беларусаў і турыстаў, якія захочуць адвезці дадому «кавалачак беларускай асаблівасці». Падобныя крамы адкрыліся і ў іншых гарадах. Стваральнікі хочуць, каб у кожным беларускім доме былі рэчы з беларускім каларытам і беларускай асаблівасцю.

У краму сям'я Сяргея - былога таксіста і палітычнага актывіста - і рамесніка Вольгі ўклала блізу 3000 даляраў. Столькі пацягнуў рамонт, закупка мэблі і прадукцыі. Адбіць суму плануюць праз паўгода ці год. Прасоўваць краму будуць праз старонкі ў сацыяльных сетках і абвестках на рынку. «Усё залежыць ад пакупніцкай здольнасці нашых людзей. Наколькі яны здольныя купіць сабе нешта беларускае, а не проста аддаць на каўбасу».

Гаспадары кажуць, што бачаць патрэбу ў такіх вырабах, а крама будзе яшчэ адной цаглінкай у беларускай самасвядомасці.