У дзіцячых садках Магілёва дзяцей перасталі карміць мясам

Рыба таксама знікла з меню.

«У меню дзіцячых садкоў на два тыдні зніклі мяса і рыба», - паведамілі tut.by бацькі дзяцей з Кастрычніцкага раёна Магілёва. У адміністрацыі раёна пацвердзілі, што перабоі з пастаўкамі мяса сапраўды былі, але толькі два дні - 12 і 13 лістапада. Журналісты даведаліся, калі мяса вернецца ў меню.

- У садках Магілёва дзяцей пазбавілі бялку - мяса ў меню няма другі тыдзень, - распавялі бацькі, дзеці якіх ходзяць у розныя садкі Кастрычніцкага раёна Магілёва. - Рыбы таксама няма. На абед, напрыклад, былі бульбяное пюрэ і амлет. У нашым чаце ў Viber мы запыталіся ў выхавальніцы, чаму так. Яна не ведае.

Бацькі абураныя, бо яны, з іх слоў, рэгулярна плацяць за харчаванне ў дзіцячым садку адну і тую ж суму - і не разумеюць, чаму так змянілася меню.

- Сітуацыя ўжо выпраўленая - мяса будзе паступаць у дашкольныя ўстановы, - патлумачыла інжынер-тэхнолаг аддзела адукацыі адміністрацыі Кастрычніцкага раёна Магілёва Зарэма Гасанава. - Проста на пачатак тыдня мы не маглі прыйсці да агульнага назоўніка: магілёўскі мясакамбінат прасіў грошай, а мы не маглі іх пералічыць. Была запазычанасць, але яна ўжо выплачаная.

Са слоў інжынера-тэхнолага, з магілёўскім мясакамбінатам адміністрацыя працуе даўно. Паводле дамовы, прадпрыемства пастаўляе мяса, печань і каўбасы з папярэдняй аплатай.

Бацькі дзяцей мяркуюць, што мяса ў меню можна было б замяніць рыбай. Але і яе, як выявілася, не было.

- Рыбу пастаўляе «Белзнешрыбгандаль», і перабоі з пастаўкай на мінулым тыдні таксама былі. Мы заказвалі хека без галавы - і гэта прапісанае ў дамове, а яны паставілі рыбу з галавой і больш высокім коштам. Нам давялося адмовіцца ад пастаўкі.

Зарэма Гасанава кажа, што мяса пастаўляецца ў дзіцячыя садкі па панядзелках і серадах, рыба - па аўторках і чацвяргах.

Ці адаб'ецца адсутнасць мяса на суме аплаты за дзіцячы садок, пакуль невядома.