Беларускім журналістам прадаўжаюць выстаўляць абвінавачанні паводле «справы БелТА»

З журналістаў патрабуюць грошы.

Журналістам, якіх абвінавачваюць у прычыненні фінансавых страт дзяржаўнаму інфармагенцтву БелТА, прапануюць кампенсаваць гэтыя грошы, паведамляе прэс-служба БАЖ.

Аднак, нават калі журналісты і выплацяць выстаўленыя ім сумы, гэта ніякім чынам не здымае з іх абвінавачанні, не вызваляе ад судовага разбору.

Абвінавачванні ўжо выставілі шасці рэдактарам tut.by.

Абвінавачванне выстаўлена галоўнай рэдактарцыБелаПАН Ірыне Леўшынай, аглядальніцы БелаПАН Таццяне Каравянковай, карэспандэнту Deutsche Welle Паўлюку Быкоўскаму і галоўнаму рэдактару партала Realt.by Уладзіславу Кулецкаму.

Вядома, што некаторыя фігуранты «справы БелТА» пакуль не хочуць, каб іх імёны выдавалася.

Галоўная рэдактарка інфармагенцтва БелаПАН Ірына Леўшына пасля допыту ў Следчым камітэце распавяла, што ёй выстаўленая вялікая сума шкоды, якую трэба выплаціць. Таксама следчыя вярнулі рэчы, якія забралі пасля ператрусу: нататнікі, тэлефонную кнігу.

- Гэта было выстаўленне абвінавачвання. Я не прызнала сваёй віны, на некаторыя пытанні адмовілася адказваць. Гэта была хутчэй размова са следчым. І я яшчэ раз пераканалася, што следчыя ўсё разумеюць, і што ім было даведзена, што трэба рабіць. Усім усё зразумела. Агульная сума, якую мне прапанавалі выплаціць, - больш за 12 тысяч рублёў.

БелаПАН працуе ў ранейшым рэжыме.

Сумы шкоды, прычыненай БелТА, усім журналістам назвалі розныя.

Нагадаем, 7 жніўня ў офісах кампаній tut.by і БелаПАН прайшлі ператрусы і затрыманні. Былі затрыманыя галоўная рэдактарка tut.by Марына Золатава, рэдактаркі партала Ганна Калтыгіна, Галіна Уласік і Ганна Ермачонак, галоўная рэдактарка БелаПАН Ірына Леўшына і міжнародная аглядальніца інфармагенцтва Таццяна Каравянкова, уласны карэспандэнт «Нямецкай хвалі» Павал Быкоўскі і рэдактар інтэрнэт-сайту газеты «Беларусы і рынак» Аляксей Жукаў.

Усе яны правялі па некалькі дзён у ізалятары часовага ўтрымання на Акрэсціна. 27 жніўня большасці падазраваных быў забаронены выезд з краіны.

Журналістаў і рэдакцыі падтрымалі Еўразвяз, Рада Еўропы, ЗША, а таксама міжнародныя праваабарончыя арганізацыі.

25 верасня рэдактар партала tut.by Дзмітрый Бобрык выступіў з заявай у сваім Facebook. Журналіст паведаміў, што з самага пачатку расследавання паводле «спраы БЕЛТА» на яго ціснулі, яму пагражалі раскрыццём дэталяў з асабістага жыцця.