Беларускі фільм трапіў у лонг-ліст прэміі «Оскар»
2- 9.10.2018, 10:35
- 9,416
Ён прэтэндуе на перамогу ў намінацыі «Найлепшы фільм на замежнай мове».
«Крышталь» рэжысёркі Дар'і Жук - першая ў сучаснай гісторыі Беларусі стужка, намінаваная на амерыканскую кінапрэмію, прэтэндуе на перамогу ў намінацыі «Найлепшы фільм на замежнай мове», паведамляе «Белсат».
Усяго ў лонг-ліст увайшло 87 фільмаў. У спіс трапілі і нашы суседзі - дэбют Канстанціна Хабенскага «Сабібор», а таксама фільм Сяргей Лазніцы «Данбас».
Шорт-ліст з пяці-шасці намінантаў назавуць 22 студзеня. Цырымонія ўручэння прызоў Амерыканскай кінаакадэміі пройдзе ў 91-ы раз 24 лютага.
Дзеянне стужкі Дар'і Жук адбываецца ў 90-я гады ў Беларусі. Маладая дзяўчына-дыджэй марыць з'ехаць у Амерыку, але робіць памылку ў заяве на візу. Цяпер яна вымушаная правесці тыдзень у невялікім завадскім мястэчку, каб не пазбавіцца шанцу на выкананне сваёй «амерыканскай мары». У фільме паказана панарама жыцця 90-х: моладзевыя падпольныя вечарынкі, стыхійныя рынкі, мары моладзі пра эміграцыю і жыццё застылай у часе правінцыі.