29 сакавiка 2024, Пятніца, 18:27
Падтрымайце
сайт
Сім сім,
Хартыя 97!
Рубрыкі

«Больш за ўсё здзівіла сума, выкладзеная за тур на 10 дзён»

30
«Больш за ўсё здзівіла сума, выкладзеная за тур на 10 дзён»
Фота: otpusk.by

Маладыя беларусы падзяліліся ўражаннямі ад аднаго з найлепшых айчынных санаторыяў.

Жыхары Менска Яўген і Аксана, якім па 30 з гакам, штогод бавяць адпачынак за мяжой. Яны адпачывалі ў Грэцыі, Чарнагорыі, Гішпаніі, Італіі ды іншых еўрапейскіх краінах. Але ў верасні гэтага года пара ўпершыню ў жыцці прабавіла частку адпачынку ў санаторыі – знакамітым «Радоне», што на Гарадзеншчыне. Таму было цікава даведацца пра ўражанні маладых людзей, здольных параўнаць сэрвіс з убачаным у краінах Еўропы.

Вось што распавёў «Салідарнасці» Яўген:

- Чаму паехалі ў «Радон»? Ніколі пра такі адпачынак не марылі, гэта быў падарунак сваякоў – тур на дваіх на 10 дзён. Больш за ўсё ўразіла сума, выкладзеная за яго, - 700 даляраў. Калі б мы не пагадзіліся, то тур прапаў бы, таму разважылі, што адмаўляцца ад такой магчымасці будзе глупствам.

Жылі ў «Радоне» ў дзвюхасабовым нумары - звычайны эканомклас для еўрапейскіх краін. Нічога добрага і нічога дрэннага сказаць не магу. Адзінае - балкон выглядаў страшнавата.

Туалетная папера была самая танная, якую толькі можна знайсці ў крамах. Аднаразовых набораў (мыла/гель/шампунь) у ванным пакоі не было - толькі вельмі вадкае мыла ў душы.

Фота: otpusk.by

Практычна адразу па прыездзе зразумелі, што з боку медыцынскіх спецыялістаў, калі не станем браць дадатковыя працэдуры, да нас будзе мінімальная ўвага. А каштавалі яны ў «Радоне» нятанна. Да прыкладу, шакаладнае абкручванне абышлося б на 53 рублі. У Менску такую паслугу куплялі ў прэстыжным spa-салоне са зніжкай за 40 рублёў.

ЛЯЧЭБНАЯ ВАННА.
ФОТА: OTPUSK.BY

Здалося, што многае зроблена для таго, каб акрамя аплачанага тура выцягнуць з цябе яшчэ больш грошай. Прыехаўшы ў санаторый, са здзіўленнем даведаліся, што там ёсць толькі платная паркоўка, якую трэба дадаткова аплачваць. Бясплатна пакінуць аўто не было дзе. Мы такога раней нідзе не сустракалі.

Wi-fi у санаторыі быў жахлівым. Размаўлялі з расейцамі: ім яго не ставала, каб патэлефанаваць сваякам праз мэсэнджар. У найлепшым выпадку ўдавалася напісаць тэкставыя паведамленні. І гэта гаворка ідзе толькі пра wi-fi у фае на паверхах. У нумарах яго ў прынцыпе не было.

Асобна хачу сказаць аб харчаванні ў сталовай. Кармілі самым танным, што можна знайсці ў крамах. Пры гэтым ежы было больш чым дастаткова. Да прыкладу, кожны вечар нам давалі па пачку кефіру. Ці не лепш было б карміць пастаяльцаў больш якаснай ежай замест таго, каб закідваць іх гарой лішняга?

У ЛЯДОЎНІ ЗАПАСІЛІСЯ НЕЗАПАТРАБАВАНЫЯ ПРАДУКТЫ.

Які-небудзь рыс распаўзаўся па талерцы напаўвадкай масай. І гэта не было звязана з тым, што ў санаторыі сачылі за дыетычным харчаваннем. Нярэдка ў стравах прысутнічаў і маянэз. Нам прапаноўвалі булачкі, якіх я, напэўна, не бачыў з дзяцінства, і якія здаровай ежай назваць цяжка. Былі і такія сітуацыі: чытаеш у меню - гарнір са шпінату. А фактычна наварылі бульбы, дадалі ў яе трохі шпінату для колеру і ўсё размазалі ў пюрэ.

Фота: otpusk.by

У санаторыі былі і іншая моладзь, але ўсё ж асноўная маса была прадстаўленая людзьмі 50-60 гадоў. Практычна штодня перад абедам на ўваходзе ў сталоўку нас сустракалі прадстаўнікі беларускай эстрады - гэта была такая рэклама вечаровага канцэрта гэтых музыкаў. Іх творчасць была відавочна не для моладзі. Наогул адчувалася атмасфера 80-х.

Ніякіх цікавых для нас забавак у санаторыі або побач з ім не было. Але, з іншага боку, штодзённыя працэдуры і перапынкі паміж імі займалі большую частку дня, вольнага часу заставалася не так шмат. Дастаткова было шпацыру каля возера і лесу. Вадаём невялікі, але там можна пакарміць качак. Лес файны: камфортна прайсціся, вельмі прыемна дыхаць.

Не скажу, што адпачынак у «Радоне» пакінуў негатыўнае ўражанне, але кошт за тур з такім невысокім узроўнем сэрвісу падаўся моцна завышаным. Мне цяжка ўявіць, што з часам мы надумаем прыехаць туды за свае грошы.

Напісаць каментар 30

Таксама сачыце за акаўнтамі Charter97.org у сацыяльных сетках