У Беларусі прадаўжаюцца масавыя звальненні

З пачатку года без працы засталіся больш за 38 тысяч чалавек.

У Беларусі арганізацыі звольнілі за 9 месяцаў гэтага года крыху больш за 552 тысяч работнікаў, а працаўладкавалі - амаль на 38,3 тысячы менш. Гэта вынікае са звестак Белстату аб колькасці прынятых і звольненых работнікаў. Пры гэтым у верасні прадпрыемствы агулам выйшлі на дадатную дынаміку - звольнілі менш, чым прынялі на працу. Але такія галіны як прамысловасць і будаўніцтва па-ранейшаму ў мінусе, піша tut.by.

Так, у мінулым месяцы арганізацыі ўзялі на працу - 82 709 чалавек, а звольнілі - 61 162. Выйсці ў плюс у гэтым паказчыку атрымалася шмат у чым дзякую сферы адукацыі, дзе працаўладкавалі амаль на 116% больш, чым звольнілі. Гэта звязана шмат у чым з пачаткам навучальнага года, навучальныя ўстановы актыўна набіралі кадры.

Прадпрыемствы агулам сталі часцей звальняць за прагулы: у жніўні – 3 624 чалавекі, у ліпені - 3221, у чэрвені - 3082.

Арганізацыі, якія выконваюць паслугі часовага пражывання і харчавання, прынялі на працу амаль на 41% больш чалавек у верасні, чым звольнілі. У сферы інфармацыі і сувязі гэтая прапорцыя склала 16,1%.

Пры гэтым будаўнічыя арганізацыі ў верасні на 12,8% больш звольнілі, чым працаўладкавалі, а прамысловыя - на 10,1%. Сельская, лясная і рыбная гаспадаркі таксама ў мінусе ў гэтым паказчыку (-15,7%). Месяцам раней сітуацыя была аналагічнай: будаўнікоў, прамыслоўцаў і аграрыяў таксама больш актыўна звальнялі, чым прымалі на працу.

У эканоміцы ў верасні было занята 4 мільёны 330,1 тысячы чалавек, а жніўні - 4 мільёны 338 тысячы.

Паводле звестак выбарачнага абследавання хатніх гаспадарак, колькасць беспрацоўных паводле методыкі Міжнароднай арганізацыі працы ў трэцім квартале гэтага года склала 240,5 тысячы чалавек (годам раней - 273,9 тысячы чалавек).